یہ صفحہ دوست کو ای میل کیجیئے		پرِنٹ کریں

ہلاک ہونے والے امریکی فوجیوں کی تعداد ایک سو ننانوے ہو گئی ہے

عراق میں ایک حملے میں امریکی فوجی ہلاک ہو گیا ہے۔ اس کے علاوہ ایک دوسرا فوجی اور ایک مترجم زخمی ہو گئے ہیں۔

فوج کی ایک ترجمان نے کہا ہے کہ فرسٹ آرمرڈ ڈویژن کا فوجی بدھ کے روز مقامی وقت کے مطابق دس بجکر تیس منٹ پر اس وقت ہلاک ہوا جب بغداد کے علاقے القرادہ میں حملہ آووروں نے ان کی گشتی گاڑی پر فائرنگ کر دی۔

یہ سابق عراقی صدر صدام حسین کی گرفتاری کے بعد براہِ راست فائرنگ سے کسی امریکی کی پہلی ہلاکت ہے۔

حالیہ حملہ بغداد میں ایک پولیس اسٹیشن کے نزدیک آئل ٹینکر پھٹنے کے ایک دن بعد ہوا ہے۔ آئل ٹینکر پھٹنے سے کم از کم دس افراد ہلاک ہو گئے تھے۔

بدھ کے روز ہونے والی امریکی فوجی کی ہلاکت کو ملا کر عراق میں یکم مئی کو صدر بش کی طرف سے کیے جانے والے جنگ کے خاتمے کے اعلان کے بعد سے اب تک ایک سو ننانوے امریکی فوجی ہلاک ہو چکے ہیں۔