چین میں پانڈے کا گوشت فروخت کرنے والے شکاری گرفتار
،تصویر کا ذریعہPapilio Alamy
چین کے سرکاری ٹی وی کے مطابق پولیس نے پانڈے کا شکار کرنے کے شبہ میں دس افراد کو گرفتار کیا ہے۔
ان افراد پر الزام ہے کہ یہ پانڈے کا گوشت اور کھال فروخت کرنے کے لیے اس کا شکار کرتے تھے۔
اطلات کے مطابق دسمبر میں ایک چھاپے میں پولیس کو پانڈے کی کھال اور دس کلوگرام گوشت ملا تھا۔
پولیس حکام کے مطابق پانڈے کو ملک کے جنوبی صوبے یوننان میں دو بھائیوں نے گولی مار کر ہلاک کیا تھا۔
سنہ 2014 کے عداد وشمار کے مطابق چین میں صرف 1864 جنگلی پانڈے رہ گئے تھے۔
چین میں سماجی رابطوں کی مقبول ویب سائٹ ویبو پر پوسٹ کی گئی تصاویر میں پانڈے کی ایک خون آلود کالی اور سفید کھال کو دیکھا جا سکتا ہے۔ ان تصاویر میں گوشت سے بھرے دو تھیلے بھی نظر آ رہے ہیں۔
ڈیلی چائنا اخبار کا کہنا ہے کہ حکام کو چھاپے میں پانڈے کا سر بھی ملا ہے۔ پولیس کے مطابق مارے جانے والا پانڈا ایک بالغ مادہ تھی۔
حکام کی جانب سے جاری کی گئی تفصیلات کے مطابق گرفتار کیے جانے والے افراد میں دو شکاری اور ایک گوشت خریدنے والا شخص شامل ہے لیکن باقی سات افراد کی شناخت نہیں ظاہر کی گئی۔
End of سب سے زیادہ پڑھی جانے والی
واضع رہے کہ چین میں پانڈے کے شکار پر پابندی ہے اور خلاف وزی کرنے والوں کو دس سال سے عمر قید تک کی سزا ہو سکتی ہے اور بعض حالات میں سزائے موت بھی دی جا سکتی ہے۔
