اڑیسہ: پل کے نیچے سے 21 انسانی کھوپڑیاں برآمد
،تصویر کا ذریعہSANDEEP SAHOO
بھارت کی مشرقی ساحلی ریاست اڑیسہ میں پوری کونارک میرین ڈرائیو کے راستے میں ایک پل کے نیچے سے 21 انسانی كھوپڑياں برآمد ہوئی ہیں۔
کش بھدرا دریا پر لياكھيا کے مقام پر موجود پل کے نیچے ان انسانی كھوپڑيوں کے علاوہ تین بھینسوں کی كھوپڑياں، بہت سی ہڈیاں، کچھ خشک پھول، سندور کی ڈبیا اور پوجا میں استعمال ہونے والی دوسری چیزیں ملی ہیں۔
ان تمام چیزوں کی ایک جگہ موجودگی سے خدشہ ظاہر کیا جا رہا ہے کہ یہ معاملہ جادو ٹونے کے لیے دی جانے والی قربانی کا بھی ہو سکتا ہے۔
مقامی صحافی سندیپ ساہو کے مطابق پولیس نے ایک مقامی تانترک (جادو ٹونے کے ماہر) پديا بابا کو حراست میں لیا ہے اور اس سے پوچھ گچھ کی جا رہی ہے۔
مقامی پولیس افسر سوباس موہنتی نے بی بی سی کو بتایا: ’ہم نے تمام كھوپڑيوں کو جانچ کے لیے کٹک کے ایس سی بی میڈیکل کالج ہسپتال میں قائم فورینسک میڈیسن ڈیپارٹمنٹ میں بھیج دیا ہے۔
ان کا کہنا تھا ’رپورٹ آنے کے بعد ہی ہم کسی نتیجے پر پہنچ سکتے ہیں۔‘
مقامی لوگوں کا کہنا ہے کہ انھوں نے سنیچر کے روز شام تک وہاں اس قسم کی کوئی چیز نہیں دیکھی تھی۔
اس سے یہ اندازہ لگایا جا رہا ہے کہ کسی نے سنیچر کے روز دیر رات یہ چیزیں وہاں پہنچائی ہیں۔
End of سب سے زیادہ پڑھی جانے والی
مقامی صحافی کے مطابق علاقے میں اس بارے میں طرح طرح کی افواہیں گردش کر رہی ہیں۔
