علی سلمان بی بی سی اردو ڈاٹ کام، لاہور

	’بلوچستان کے وزیر اعلی بھائی چارے، محبت اور مفاہمت کاپیغام لائے تھے اور انہوں نے ماضی کے واقعات پر افسوس کیا‘

سابق وزیر اعلیٰ شہباز شریف نے کہا کہ قومی مفاہمت وقت کی ضرورت ہے لیکن اس کی بنیاد قومی ایشوز ہوسکتے ہیں ذاتیات نہیں۔

گورنر راج کا نفاذ افسوسناک

سابق وزیراعلیٰ پنجاب شہباز شریف ڈسٹرکٹ بار سے خطاب کے لیے بہاولپور میں موجود ہی تھے کہ کچھ دیر بعد بلوچستان کے وزیراعلیٰ اسلم رئیسانی ان سے ملاقات کے لیے خصوصی پرواز کے ذریعے پہنچ گئے۔

سترہویں ترمیم شرط ہے  اگر صدر آصف زرداری سترہویں ترمیم ختم کریں وہ مفاہمت کے لیے ایک قدم نہیں دس قدم چلنے کو تیار ہیں البتہ انہوں نے کہا کہ اگریہ سمجھا جائے کہ ہم اپنی ذات کی بحالی کے لیے مفاہمت کے لیے تیار ہیں تو خدا کی قسم قیامت آجائے گی یہ سر آپ کے سامنے جھکے گا نہیں شہباز شریف

ملاقات کے بعد شہباز شریف نے میڈیا کو بتایا کہ بلوچستان کے وزیراعلیٰ نےمفاہمت کے ذریعے ملک کے موجودہ بحران کے خاتمے کی خواہش ظاہر کی ہے اور جواباً انہوں نے اسلم رئسیانی کے اس جذبہ کے ستائش کی ہے۔

شہباز شریف کے بقول بلوچستان کے وزیر اعلی بھائی چارے، محبت اور مفاہمت کاپیغام لائے تھے اور انہوں نے ماضی کے واقعات پر افسوس کیا۔

شہباز شریف نے کہا کہ انہوں نے کہا اسلم رئیسانی کو کہا کہ ان کی ایک بلوچ، ایک پاکستانی اور ایک صوبے کے وزیر اعلیٰ ہونے کے ناطے مفاہمت کی کوششیں قابل قدر ہیں۔

مفاہمت سے انکار نہیں  وہ مفاہمت کی بات کرتے ہیں لیکن نواز شریف نے کب اس سے انکار کیا تھا آپ خود معاہدے لکھ کر منحرف ہوگئے تھے۔حکومت فوری طور پر عدلیہ بحال کرے اور اپنے غیرجمہوری اقدامات واپس لیں بصورت دیگر یہ قوم قربانی دینے کی بڑی قوت رکھتی ہے شہباز شریف

سابق وزیر اعلی نے کہا کہ وہ مفاہمت کی بات کرتے ہیں لیکن نواز شریف نے کب اس سے انکار کیا تھا آپ خود معاہدے لکھ کر منحرف ہوگئے تھے۔انہوں نے مطالبہ کیا کہ حکومت فوری طور پر عدلیہ بحال کرے اور اپنے غیرجمہوری اقدامات واپس لیں بصورت دیگر یہ قوم قربانی دینے کی بڑی قوت رکھتی ہے۔