ذیشان ظفر بی بی سی اردو ڈاٹ کام، اسلام آباد

	شریف الدین پیرزادہ کو سفیرِ عمومی بنا کر وفاقی وزیر کا درجہ دیا گیا ہے

منگل کے روز وفاقی وزیر برائے پارلیمانی امور سینیٹر بابر اعوان نے میڈیا سے بات کرتے ہوئے کہا کہ ان کی حکومت نے سید شریف الدین پیر زادہ کی بطور سفیرِ عمومی نہ تو تقرری کی ہے اورنہ ہی موجودہ حکومت میں ان کے پاس کوئی سرکاری عہدہ ہے ۔

کابینہ کے خفیہ وزیر

واضع رہے کہ سیدشریف الدین پیرزادہ کو سفیرِ عمومی انیس سو پچانوے میں پیپلز پارٹی کے دوسرے دور حکومت میں بنایا گیا تھا۔ اور تاحال اسی عہدے پر فائز ہیں ۔

دوسری جانب شریف الدین پیرزادہ نے بی بی سی بات کرتے ہوئے کہا ’ سفیرِ عمومی اور وفاقی وزیر کے برابر درجہ ہونا ان کا ذاتی معاملہ ہے اور وہ اس معاملے پر کوئی بات نہیں کر سکتے ہیں ۔’

ایک سوال کے کہ وفاقی وزیر بابر اعوان کا کہنا ہے کہ موجودہ حکومت آپ کے پاس کوئی عہدہ نہیں ہے تو اس پر انھوں نے یہ کہتے ہوئے فون بند کر دیا کہ کسی کے بیان پر وہ کوئی تبصرہ نہیں کر سکتے ہیں ۔

قانون دان اکرم شیخ نے جو میاں نواز شریف کے دوسرے دور حکومت میں سفیر عمومی رہ چکے ہیں بی بی سی سے بات کرتے ہوئے کہا کہ سفیر عمومی کو وہ تمام سرکاری سہولیات میسر ہوتی ہیں جو ایک وفاقی وزیر کو فراہم کی جاتی ہیں جس میں سرکاری گھر، گاڑی اور دیگر سہولیات شامل ہوتی ہیں ۔ تاہم ابھی واضع نہیں کہ سید شریف الدین پیرزادہ کو کون سی سرکاری سہولیات میسر ہیں ۔

واضع رہے کہ پاکستان میں قانون دان سید شریف الدین پیر زداہ ایک متنازعہ شخصیت ہیں جو جنرل ایوب سے لیکر جنرل پرویز مشرف کے اقتدار کو تحفظ دینے کے لیے قانونی معاونت کر چکے ہیں اس کے علاوہ وہ سابق صدر جنرل پرویز مشرف کے انتہائی قریبی ساتھی تصور کیے جاتے تھے۔