دلاورخان وزیر بی بی سی اردو ڈاٹ کام، پشاور

	ڈیرہ اسماعیل خان ماضی میں فرقہ وارانہ وارداتوں کا نشانہ بن چکا ہے(فائل فوٹو)

ڈیرہ اسماعیل خان پولیس کا کہنا ہے کہ پیر کو ڈیرہ شہر میں دو نامعلوم موٹر سائیکل سواروں نے منور حسن شاہ کو فائرنگ کر کے اس وقت ہلاک کر دیا جب وہ بچوں کو سکول چھوڑ کر واپس گھر لوٹ رہے تھے۔

پولیس کے ایک اہلکار نے بی بی سی کو بتایا کہ منور حسن شاہ نواحی علاقے کوٹلہ سیداں کے رہائشی اور ڈیرہ امن کمیٹی کے ممبر بھی تھے۔

پولیس اہلکار کےمطابق اس واقعہ کے کچھ دیر بعد کلاں بازار میں بھی نامعلوم افراد نے فائرنگ کر کے مقبول حسین نامی شخص کو شدید زخمی کر دیا جنہیں تشویشناک حالت میں ڈیرہ سے اسلام آباد منتقل کر دیا گیا ہے۔

انہوں نے کہا کہ دونوں واقعات کے بعد پولیس نے ڈیرہ شہر اور مضافاتی علاقوں میں تلاشی کا عمل شروع کیا ہے لیکن تاحال کی قسم کی گرفتاری عمل میں نہیں آئی ہے۔ان کا کہنا تھا کہ پولیس نے ڈیرہ شہر کے داخلی خارجی راستوں میں ناکے بھی لگائے ہیں اور مشکوک لوگوں کو روکا جا رہا ہے۔

یاد رہے کہ ڈیرہ اسماعیل خان فرقہ وارانہ لحاظ سے انتہائی حساس ضلع ہے اور گزشتہ ایک سال کے دوران یہاں کئی بار مسلکِ تشیع سے تعلق رکھنے والے افراد پر حملے ہوئے ہیں۔