دلاورخان وزیر بی بی سی اردو ڈاٹ کام، ڈیرہ اسماعیل خان

	حملہ آور کو مسجد کے دروازے سے گرفتار کیا گیا

پولیس کے مطابق حملہ آور کا تعلق نیم قبائلی علاقے درہ آدم خیل سے بتایا جاتا ہے۔ اس کا نام شکیل ولد جمال حسن اور تعلق آفریدی قبائل سے ہے۔

ڈیرہ اسماعیل خان پولیس کے ایک افسر اسداللہ مروت نے بی بی سی کو بتایا کہ جمعہ کی نماز کے دوران شہر میں واقع لاٹو فقیر مسجد کے دروازے میں ایک مبینہ خودکش حملہ آور کو پولیس نے اس وقت گرفتار کرلیا جب وہ مسجد کے اندر داخل ہونے کی کوشش کر رہا تھا۔

اسداللہ مروت کے مطابق مسجد کے دروازے میں دو پولیس اہلکار ڈیوٹی دے رہے تھے کہ مسجد کے چوکیدار نے ان کو بتایا کہ یہ شخص مشکوک ہے جس پر پولیس اہلکاروں نے ان کو پیھچے سے پکڑ کر اس کے ہاتھوں کو نیچے چھوڑنے نہیں دیا۔

انہوں نے مزید بتایا کہ حملہ آور کی خودکش جیکٹ کو پولیس نے موقع ہی پر اتار دیا۔انہوں نے بتایا کہ حملہ آور کے قبضہ سے خودکش جیکٹ، پستول اور ایک دستی بم بھی برآمد کیا گیا ہے۔

پولیس اہلکار کے بقول حملہ آور نے دھماکہ کرنے کے لیے اپنے جسم کے آگے اور پیھچے دو بٹن نصب کیے تھے لیکن سکیورٹی اہلکاروں نے اس کا ہاتھ بٹن تک پہنچنے سے پہلے ہی اسے قابو کر لیا۔

ایک عینی شاہد محمد ثقلین نے بی بی سی کو بتایا کہ پہلی رکعت میں یہ واقع پیش ہوا جس کے بعد مسجد میں کھلبلی مچ گئی۔ انہوں نے کہا کہ حملہ آور اٹھارہ یا انیس سالہ نوجوان تھا جس کی چھوٹی چھوٹی مونچھیں بھی تھی۔

انہوں نے کہا کہ نمازیوں نے حملہ آور کو سخت مارا پیٹا لیکن پولیس اہلکاروں نے اس کو بچا لیا۔

حکام کے مطابق حملہ آور کا ہدف یقینی طور اہل تشیع کا مسجد تھا۔ اس سے پہلے بھی اہل تشیع والوں پر خودکش اور دیگر بم حملے ہوچکے ہیں جس میں کئی لوگ ہلاک ہوئے ہیں۔