دلاور خان وزیر بی بی سی اردو ڈاٹ کام ڈیرہ، اسماعیل خان

	پولیس نے تلاش شروع کر دی ہے لیکن تاحال کسی قسم کی گرفتاری عمل میں نہیں آئی ہے

ڈیرہ اسماعیل خان پولیس کا کہنا ہے کہ شہر سے تقریباً بیس کلومیٹر دور درابن کلاں روڈ پر دو نامعلوم موٹر سائیکل سواروں نے ایک ٹریکٹر پر فائرنگ کرکے اہل تشیع سے تعلق رکھنے والے تین افراد کو ہلاک کردیا۔

پولیس کے مطابق ہلاک ہونے والوں میں قلب حسین، منیرحسین اور رضوان حیدر شامل ہیں۔ انہوں نے کہا کہ ہلاک ہونے والے تینوں افراد کا تعلق کوٹلی سیداں سے ہے۔ جہاں پہلے بھی شیعہ مسلک کے لوگوں پر حملے ہوئے ہیں۔

انہوں نے کہا کہ پولیس نے تلاش شروع کر دی ہے لیکن تاحال کسی قسم کی گرفتاری عمل میں نہیں آئی ہے۔ ان کا کہنا ہے کہ ڈیرہ اسماعیل خان شہر میں ایف سی اور پولیس کی نفری میں اضافہ کردیاگیا ہے اور ڈیرہ سرکلر روڈ پر پولیس نے گشت شروع کردیا گیا ہے۔

یاد رہے کہ ڈیرہ اسماعیل خان سنی شیعہ فسادت کے لحاظ سے انتہائی حساس ہے اور گزشتہ چند ماہ کے دوران ایک دوسرے پر حملوں میں اضافہ ہوا ہے۔ اس واقعہ سے دو دن پہلے ایسے ہی حملوں میں تین افراد ہلاک ہوگئے تھے۔