دلاور خان وزیر بی بی سی اردو ڈاٹ کام، ڈیرہ اسماعیل خان

	ڈیرہ اسماعیل خان میں چند روز پہلے ہی ایک یونین کونسل ناظم کو گولیاں مار کر ہلاک کر دیا گیا تھا

ڈیرہ اسماعیل خان پولیس کے ایک افسر صلاح الدین نے بی بی سی کو بتایا کہ اتوار کو رات دس بجے کے قریب شیعہ مسلک سے تعلق رکھنے والا عمران عباس اکیلے سائیکل پر گھر جا رہے تھے کہ کوٹلی امام کے قریب دو نامعلوم موٹر سائیکل سواروں نے ان پر اندھا دھندہ فائرنگ کی جس کے نیجہ میں وہ موقع ہی پر ہلاک ہوگیا۔ پولیس کے مطابق پولیس موبائل موقع پر پہنچ گئی لیکن نامعلوم افراد فرار ہونے میں کامیاب ہوگئے۔

پولیس کا کہنا ہے کہ عمران عباس ڈیرہ اسماعیل خان میں ایک جلد ساز تھا اور کوٹ امام کے قریب آبادی کا رہنے والا تھا۔پولیس کے مطابق عمران عباس کی کسی سے کوئی دشمنی نہیں تھی۔ اس واقع کے بعد مقامی بازار غیر اعلانیہ طور پربند ہوگیا اور ہسپتال کے سامنے لوگ کی ایک بڑی تعداد جمع ہوگئی اور حکومت کے خلاف زبردست نعرے بازی کی۔

ڈیرہ شہر میں ایک بار پھر ایف سی اور پولیس کی نفری میں اضافہ کردیاگیا ہے۔ ڈیرہ شہر اور ڈیرہ سرکلر روڈ پر گشت شروع کردیاگیا ہے۔پولیس شہر میں داخل ہونے راستوں میں جگہ جگہ ناکے بنا رہے ہیں۔

یاد رہے ڈیرہ اسماعیل خان سنی شیعہ فسادت کے لحاظ سے انتہائی حساس ہے۔گزشتہ ایک مہینے میں ایک دوسرے پر یہ اٹھواں حملہ ہے۔اس سے پہلے سات واقعات میں پندرہ افراد ہلاک ہوگئے تھے۔اور ہر ایک واقع کے بعد ڈیرہ شہر مکمل طور پر بند ہوتا رہتا ہے اور گزشتہ سال اپریل میں سنی شیعہ فسادت کے بعد ڈیرہ اسماعیل خان شہر میں ایک مہینے تک کرفیو لگایا تھا۔