دلاور خان وزیر بی بی سی اردو ڈاٹ کام، ڈیرہ اسماعیل خان

	شہر میں پولیس کی چودہ موبائل ٹیموں نےگشت شروع کیا ہے اور بائیس مقامات پر ناکے لگائے گئے ہیں

گزشتہ شام کو نامعلوم موٹر سائیکل سواروں نے سنی مسلک سے تعلق رکھنے والے ایک دوکاندار پر فائرنگ کی جس میں وہ شدید زخمی ہوگیا ہے۔ اس کے بعد ڈیرہ شہر مکمل طور بند ہوگیا اور آج اتوار کو شہر کے بعض علاقوں میں دوکانیں کھلی رہیں لیکن خوف کی فضاء بدستور موجود رہی۔

دوسری جانب حالات پر قابو پانے کے لیے ڈیرہ اسماعیل خان پولیس نے شہر میں سکیورٹی پلان ترتیب دے دیا ہے۔ جس میں دہشت گردی کی کارروائی کر کے بھاگنے والے افراد کو فوری پر گولی مارنے کا حکم دیا ہے۔

ڈیرہ پولیس کے مطابق شہر میں پولیس نے دہشت گردی کی وارداتوں کو کنٹرول کرنے کے لیے بنائے گئے پلان کے بعد شہر میں بکتربند گاڑیوں کا گشت شروع ہوگیا ہے اور امام بارگاہوں مساجد اور اہم مقامات پر پولیس اور ایف سی کے دستے تعینات کیے گئے ہیں۔

پولیس کے مطابق ڈیرہ اسماعیل خان کے نواحی تھانوں کے ایس ایچ او ڈیرہ شہر میں خصوصی ڈیوٹیاں سرانجام دیں گے۔ جبکہ ایڈیشنل ایس ایچ او ان تھانوں کے انچارج ہوں گے۔

شہر میں پولیس کی چودہ موبائل ٹیموں نےگشت شروع کیا ہے اور بائیس مقامات پر ناکے لگائے گئے ہیں جس میں آنے جانیوالوں کو سختی سے چیک کیا جا رہا ہے اور موٹر سائیکل کی ڈبل سواری پر پابندی لگائی ہے۔

یاد رہے کہ گزشتہ روز ڈیرہ اسماعیل خان کے مصروف ترین بازار مسگراں میں نامعلوم افراد نے فائرنگ کر کے شیعہ مسلک سے تعلق رکھنے والے تین افراد کو ہلاک کر دیا تھا۔ اس کے بعد شام کو بھی نامعلوم افراد نے سنی مسلک سے تعلق رکھنے والے ایک دوکاندار کو شدید زخمی کر دیا تھا۔