محمد حنیف بی بی سی اردو ڈاٹ کام، کراچی

گزشتہ ہفتے ایک ہی رات میں پانچ سکولوں کو تباہ کر دیا گیا تھا

بچے کو سکول بھیجنے سے پہلے یا اسکے بعد آپ نے اخبار دیکھا ہوگا ٹی وی پر چلتے ٹِکر پڑھے ہوں گے اور سوات کی ان بچیوں کے بارے میں سوچ کر تاسف سے سر ہلایا ہوگا جن کے سکول بارود سے اڑائے جا رہے ہیں۔

	سوات میں سینکڑوں سکول تباہ کیے جا چکے ہیں

اگر سیاست کو لوگوں کی امنگوں کے پیمانے کے طور پر لیا جائے تو بنیادی حقیقت یہ ہے: 1988 کے انتخابات سے پہلے ایک غیرسرکاری ادارے نے پورے ملک کا ایک نمائندہ سروے کیا اور پوچھا کہ لوگوں کے مطالبات انتخابی امیدواروں سے کیا ہے۔ پہلے نمبر پر پینے کا صاف پانی، دوسرے نمبر پر گرلز سکول۔ اور لڑکیوں کے سکولوں کی زیادہ مانگ ان علاقوں میں تھی جنہیں عرف عام میں پسماندہ کہا جاتا ہے۔

اس سے پہلے جنرل ضیاالحق نے چادر اور چار دیواری کے نام پر عورتوں کو گھروں میں قید کرنے کی کوشش کی لیکن تمام تر کالے قوانین کے باوجود پہلے سے زیادہ لڑکیاں سکول جانے لگیں اور سرکاری اور غیر سرکاری اداروں میں اپنی جگہ بنانی شروع کردی۔ گذشتہ 20 سال میں بھی کاروکاری، ونی، زندہ دفن کیے جانے اور تیزاب پھینکنے کے ہزاروں واقعات کے باوجود لڑکیوں کی تعلیم پاکستان میں سب سے زیادہ پھیلتا ہوا کاروبار ہے۔

اور وجہ صاف ظاہر ہے کہ پسماندہ سے پسماندہ علاقے کے باسی کو بھی یہ پتہ ہے کہ اسکی آنے والی نسلیں اس سے بہتر زندگی گزاریں اور اس پسماندگی سے نجات کا واحد راستہ تعلیم میں نظر آتاہے۔

ہمارا قصور نہیں ہے  جب افغانستان میں طالبان نے لڑکیوں کی تعلیم پر پابندی لگائی تو یہ ہمارا مسئلہ نہیں تھا۔ وزیرستان کے سکول تباہ ہوئے ہم امریکہ کو گالی دیتے رہے۔ سوات میں آہستہ آہستہ سکول دھماکوں سے اڑائے جانے لگے ہم فوج پر تنقید کرتے رہے۔ اب طالبان نے لڑکیوں کی تعلیم پر مکمل پابندی لگا دی ہے تو یہ آصف زرداری کی حکومت کی ناکامی ہے

پاکستان کی مشہور فلم ساز صبیحہ سمارکی فلم The Dinner with President کے ایک سین میں صبیحہ خیبر ایجنسی کے پاس کچھ قبائلی بزرگوں سے تکرار کرتی ہیں کہ وہ عورتوں کو برابر حقوق کیوں نہیں دیتے جب وہ قبائلی روایتوں کی بات کرتے ہیں تو صبیحہ ناراض ہو کر جانے لگتی ہے۔ ایک بوڑھا قبائلی پیچھے سے کہتا ہے کہ ہم تو چاہتے ہیں ہماری بیٹیاں بھی تمہاری طرح پڑھ لکھ جائیں۔

جب افغانستان میں طالبان نے لڑکیوں کی تعلیم پر پابندی لگائی تو یہ ہمارا مسئلہ نہیں تھا۔ وزیرستان کے سکول تباہ ہوئے ہم امریکہ کو گالی دیتے رہے۔ سوات میں آہستہ آہستہ سکول دھماکوں سے اڑائے جانے لگے ہم فوج پر تنقید کرتے رہے۔ اب طالبان نے لڑکیوں کی تعلیم پر مکمل پابندی لگا دی ہے تو یہ آصف زرداری کی حکومت کی ناکامی ہے۔

اب قوم کے سیانے یہ بھی فرما رہے ہیں کہ سوات میں اگر شریعت نافذ کر دی جائے (اور یہ بھی یاد کرایا جاتا ہے کہ اس طرح کا قانون پہلے ہی موجود ہے) تو طالبان اپنی حرکتوں سے باز آجائیں گے۔

	طالبان ڈرا دھمکا کر شریعت لانا چاہتے ہیں

اسی طرح کی دلیل چند ہفتے پہلے اس وقت سننے میں آئی جب لاہور کے تھیٹروں کے باہر دھماکے ہوئے۔ یہ کہا گیا کہ اگر ان ڈراموں میں کام کرنے والے لوگ شائستگی کا دامن ہاتھ سے نہ چھوڑیں، فحش جگت بازی نہ کریں تو دھماکے ہونا بند ہو جائیں گے۔

گلے اور کان کاٹ کر جس طرح کی شریعت طالبان نافذ کر رہے ہیں کیا پیپلز پارٹی کی حکومت اس سے بہتر شریعت نافذ کر سکتی ہے؟ اگر پورا ملک موسیقی سننا چھوڑ کر، لطیفوں اور جگتوں سے کان بند کر کے، شلوار ٹخنوں سے اوپر کر کے ایک ازلی نماز کی نییت باندھ لے تو کوئی گارنٹی دے سکتا ہے کہ کوئی دھماکہ نہیں ہوگا۔

جب تک آپ یہ باتیں پڑھیں گے، ان سے اختلاف یا اتفاق کریں گے سکول کی چھٹی کا وقت ہو چکا ہوگا۔ آپکا بچہ گھر آجائے گا آپ اس سے پوچھیں گے کہ سکول میں دن کیسا گزرا۔ شاید یہ خیال ایک مرتبہ پھر آئے کہ شکر ہے آپ سوات میں نہیں رہتے۔ لیکن پاکستان کا نقشہ اٹھا کر دیکھیے دو سال پہلے تک سوات بھی سوات نہیں تھا۔ سوات سفر میں ہے اور جلد آپکے شہر پہنچنے والا ہے۔