ہارون رشید بی بی سی اردو ڈاٹ کام، اسلام آباد

	’جن کی اپنی اہلیت متنازعہ ہو وہ کسی اور کی اہلیت کا فیصلہ کیا کرسکیں گے۔ میرے منصف عوام ہیں‘

اسلام آباد میں پنجاب ہاؤس میں ایک اخباری کانفرنس سے خطاب کرتے ہوئے نواز شریف نے کہا کہ گیند اب حکومت کے کورٹ میں ہے اور مزید تاخیر سے بدگمانیاں اور انتشار بڑھے گا۔

مسلم لیگ کی جانب سے مجوزہ بل کا مسودہ کل حکمراں جماعت کے رہنماؤں کو پیش کیا گیا تھا۔ ’ہمارا ترمیمی بل کا مسودہ غیرمتنازعہ ہے تاکہ سترہویں آئینی ترمیم کی منسوخی میں دیر نہ ہو۔ اتفاق رائے کی گنجائش نہیں یہ ترمیم تو میثاق جمہوریت کا پہلا نکتہ تھی۔ نہ تو بینظیر بھٹو کی سیاسی وصیت ہے۔ یہ بل دو سو فیصد میثاق جمہوریت پر مبنی ہے۔‘

’غیرمتنازعہ مسودہ‘  ہمارا ترمیمی بل کا مسودہ غیرمتنازعہ ہے تاکہ سترہویں آئینی ترمیم کی منسوخی میں دیر نہ ہو۔ اتفاق رائے کی گنجائش نہیں یہ ترمیم تو میثاق جمہوریت کا پہلا نکتہ تھی۔ نہ تو بینظیر بھٹو کی سیاسی وصیت ہے۔ یہ بل دو سو فیصد میثاق جمہوریت پر مبنی ہے نواز شریف

انہوں نے وکلاء کی جانب سے نو مارچ کو آزادی عدلیہ کے لیے مارچ کی حمایت کا اعلان دوبارہ کرتے ہوئے اس میں بھرپور شرکت کا عزم کیا۔ ’مسلم لیگ پہلے دن سے اس تحریک میں ہراول دستے کے طور پر متحرک رہی ہے اور آئندہ بھی یہ کردار ادا کرتی رہے گی۔‘

مسلم لیگ (ن) کے سربراہ کے ہمراہ اس اخباری کانفرنس میں قومی اسمبلی میں قائد حزب اختلاف چوہدری نثار علی خاں، اسحاق ڈار اور احسن اقبال بھی موجود تھے۔

نواز شریف نے یاد دلایا کہ گزشتہ برس اٹھارہ فروری کے عام انتخابات میں لوگوں نے تبدیلی اور پارلیمان کی بالادستی کے لیے ووٹ دیا تھا۔ ’آج پارلیمان ناتواں اور عدلیہ عوام کے اعتماد سے محروم ہو چکی ہے۔ ملک میں خوشحالی کے خواب ادھورے رہ گئے ہیں۔‘

سپریم کورٹ میں ان کی نااہلیت سے متعلق جاری سماعت کا ذکر کرتے ہوئے واضح کیا کہ آمریت کی باقیات کو ہٹانے کے لیے انہیں نااہل قرار دیا جاتا ہے تو وہ انہیں قبول ہوگا۔’میں ایک نشست کے لیے سولہ کروڑ عوام کے حق سے دستبردار نہیں ہوں گا۔جن کی اپنی اہلیت متنازعہ ہو وہ کسی اور کی اہلیت کا فیصلہ کیا کرسکیں گے۔ میرے منصف عوام ہیں۔‘

برطانوی وزیر خارجہ ڈیوڈ ملی بینڈ اور بھارتی ہائی کمشنر سے آج ملاقاتوں کا ذکر کرتے ہوئے انہوں نے کہا کہ انہوں نے دونوں ممالک کی قیادت سے زیادہ سنجیدگی کا ثبوت دینے کا تقاضہ کیا ہے۔ ’دونوں پوائنٹ سکورنگ کی بجائے دہشت گردی کے خاتمے کے لیے بات کریں۔‘