عباد الحق بی بی سی اردو ڈاٹ کام، لاہور

	وزیراعظم یوسف رضا گیلانی کی تبدیلی کی کوئی بات نہیں: قریشی

وزیر خارجہ شاہ محمود قریشی نے اپنے آبائی شہر ملتان میں میڈیا سے بات کرتے ہوئے کہا کہ ممبئی دھماکوں کے بعد ہندوستان اور پاکستان کے درمیان جاری مذاکرات کا عمل تعطل کا شکار ہوا ہے لیکن حکومت پاکستان کی یہ اولین کوشش ہوگی کہ مذاکرات کے عمل میں جو تعطل پیدا ہوا ہے اس کو ختم کیا جائے تاکہ تعلقات معمول کی طرف آئیں۔

شاہ محمود قریشی کے بقول پاکستان اور ہندوستان کے درمیان جب کشیدگی نے جنم لیا تو حکومت پاکستان کے تین مقاصد تھے اور پاکستان اپنے ان مقاصد کے قریب پہنچا ہے۔ انہوں نے بتایا کہ حکومت کا پہلا مقصد جنگ سے بچنا، دوسرا مقصد پاکستان عالمی سطح پر تنہا نہ ہوجائے اور تیسرا مقصد اندرونی عدم استحکام سے بچاؤ ہے۔

وزیر خارجہ کا کہنا ہے کہ دہشت گردی نے پورے خطے کو اپنی لپیٹ میں لیا ہوا ہے اور دہشت گردی کا واقعہ پاکستان، ہندوستان یا خطے کے کسی علاقے میں ہوسکتا ہے۔

سنگین نوعیت کا واقعہ  ہمیں حقائق کو تسلیم کرنا ہوگا کیونکہ ایک سنگین نوعیت کا واقعہ ہوا ہے اور ایسا حل تلاش کرنا ہے تاکہ ایسا واقعہ دوبارہ نہ ہو۔ شاہ محمود قریشی

انہوں نے بتایا کہ پاکستان کی پالیسی ہے کہ اس کے اپنے پڑوسیوں سے اچھے تعلقات ہوں۔ ان کے بقول بھارت کے ساتھ اچھے تعلقات پاکستان کے مفاد میں ہیں اور اس طرح استحکام پیدا ہوگا جس سے پاکستان کے فائدے میں ہے۔

ان کا کہنا تھا کہ پاکستان اور امریکہ کے درمیان ملزموں کے تبادلے کا معاہدہ تو ہے لیکن بھارت کے ساتھ پاکستان کا ایسا کوئی معاہدہ نہیں ہے۔

ایک سوال پر شاہ محمو د قریشی نے کہا کہ اسرائیل عزہ پر فضائی اور زمینی حملے فوری طور پر بند کرے اور مسئلہ کو بات چیت کے ذریعے حل کیا جائے۔

بینظیر بھٹو قتل کے بارے میں قریشی کا کہنا تھا کہ اقوام متحدہ نے فیصلہ کر لیا ہے کہ قتل کی چھان بین کے لیے جوڈیشل کمیشن تشکیل دیا رہا ہے۔

انہوں نے مزید کہا کہ ہوسکتا ہے کہ آصف علی زرداری کے علم میں بینظیر بھٹو قتل کے بارے میں کچھ باتیں ہوں اور ہوسکتا ہے کہ وہ کسی فورم پر اپنا موقف پیش کریں کیونکہ اس قسم کی معلومات پریس کانفرنس میں پیش کرنے کی کوئی حیثیت نہیں ہوتی۔

وزیر اعظم یوسف رضا گیلانی کی تبدیلی کے بارے میں سوال پر وزیر خارجہ کا کہنا تھا کہ ایسی کوئی بات نہیں ہے۔