ریاض سہیل بی بی سی اردو ڈاٹ کام ، کراچی

	عالمی سطح پر بازار حصص مشکلات کا شکار ہیں

کراچی سٹاک ایکسیچنج میں منگل کو حصص کے سودوں میں مزید تین عشاریہ آٹھ فیصد کمی دیکھی گئی۔ ہنڈریڈ انڈیکس دو سو پینسٹھ پوائنٹس کی کمی کے ساتھ چھ ہزار چھ سو ساٹھ پوائنٹس پر بند ہوا۔

سٹاک مارکیٹ کو ساڑھے تین ماہ کے کاروباری انجماد کے بعد پندرہ دسمبر کو کھولا گیا اور ابھی تک بازار میں شدید مندی غالب رہی ہے اور اس میں مجموعی طور پر ستائیس فیصد گراوٹ آچکی ہے۔

کے ایس ای ہنڈریڈ انڈیکس جو نو ہزار ایک سو ستاسی پوائنٹس کی سطح پر تھا وہ اس وقت چھ ہزار چھ سو ساٹھ پوائنٹس پر آگیا ہے۔

حکام کہاں ہیں؟  پوری دنیا میں سرمائے کی مندی ہے حکومتیں بازار حصص کو بچانے کے لیے منصوبے بنا رہی ہیں، مشیر خزانہ شوکت ترین نے وعدہ کیا تھا کہ حکومت مدد کرے گی مگر اب وہ ٹیلیفون پر بھی دستیاب نہیں ہیں۔آئی ایم ایف نے بھی کہا تھا کہ وہ مدد کریں گے مگر وہ نہیں بتا رہے کہ کب مدد کریں گے۔مارکیٹ دیوالیہ کے قریب پہنچ چکی ہے آہستہ آہستہ تمام بروکر دیوالیہ پن کی طرف جارہے ہیں۔ احسن محنتی

سٹاک مارکیٹ میں کاروبار کو سہارا دینے کے لیے حکومت نے بیس ارب روپے فنڈ فراہم کرنے کی یقین دہانی کرائی تھی جو ابھی تک قابل عمل نہ ہوسکی ہے۔

تجزیہ نگار احسن محنتی کا کہنا ہے کہ پوری دنیا میں سرمائے کی مندی ہے حکومتیں بازار حصص کو بچانے کے لیے منصوبے بنا رہی ہیں، مشیر خزانہ شوکت ترین نے وعدہ کیا تھا کہ حکومت مدد کرے گی مگر اب وہ ٹیلیفون پر بھی دستیاب نہیں ہیں۔

ان کے مطابق آئی ایم ایف نے بھی کہا تھا کہ وہ مدد کریں گے مگر وہ نہیں بتا رہے کہ کب مدد کریں گے۔ ’مارکیٹ دیوالیہ کے قریب پہنچ چکی ہے آہستہ آہستہ تمام بروکر دیوالیہ پن کی طرف جارہے ہیں۔‘

دوسری جانب کاروباری سودوں کی ادائیگیوں کے لیئے کام کرنے والے ادارے نیشنل کلیئرنگ کمپنی آف پاکستان لمیٹیڈ نے ادائیگی نہ کرنے پر چالیس سے زائد بروکروں کو معطل کردیا ہے اور اب وہ حصص کا کاروبار نہیں کرسکیں گے۔

قوائد و ضوابط کے مطابق اگر مطلوبہ رقم ادا نہیں کی گئی تو نادہندہ بروکروں کو ایک اور نوٹس دیا جائے گا جِس کے بعد اُن کے خلاف دیوالیہ قرار دیے جانے کی کارروائی شروع ہو سکتی ہے۔

یاد رہے کہ کراچی سٹاک مارکیٹ میں ساٹھ فیصد کاروبار حکومتی اداروں کا ہے تجزیہ نگاروں کا کہنا ہے کہ حکومت مدد نہ کر کے خود قومی خزانے کو نقصان پہنچا رہی ہے۔