آصف فاروقی بی بی سی ارودوڈاٹ کام، اسلام آباد

	سائبر قوانین کے تحت افواہ پھیلانے والے ایس ایم ایس پر کارروائی کی جائے گی: حکومت

وزارت داخلہ سے جاری ہونے والے ایک بیان کے مطابق سٹاک مارکیٹ میں خرید و فروخت کے لیے آنے والے حصص کے بارے میں افواہوں کو بند کرنے کے لئے ایف آئی اے کے ذریعے تحقیقات کرانے کا فیصلہ کیا ہے۔

اس بیان میں کہا گیا ہے کہ آئندہ اس نوعیت کی افواہوں کی، چاہے وہ موبائل فون کے ٹیکسٹ میسج کےذریعے پھیلائی جائیں یا کسی اور ذریعے سے، ایف آئی اے کا سائبر کرائمز ونگ تحقیقات کرے گا اور قانونی کارروائی کی جائے۔

واضح رہے کہ گزشتہ ہفتے ملک کی سب سے بڑی کراچی کی سٹاک مارکیٹ کئی ماہ مسلسل بحران کا شکار رہنے کے بعد پانچ ہزار پوائنٹس گری تھی جس سے سرمایہ کاروں کے کئی سو ارب روپے ڈوب گئے تھے۔ سرمایہ کاروں نے اس گراوٹ کو سازش قرار دیتے ہوئے ملک بھر کی سٹاک مارکیٹس کے باہر مظاہرے کیے تھے اور اس بحران میں ملوث افراد کے خلاف کارروائی کا مطالبہ کیا تھا۔

وزارت داخلہ سے ہی جاری ہونے والے ایک اور بیان میں بتایا گیا ہے کہ ایران اور افغانستان کو پٹرول اور ڈیزل کی سمگلنگ کا سخت نوٹس لیتے ہوئے اس غیرقانونی نقل حمل کو روکنے کے لئے صوبہ سرحد اور بلوچستان کی پولیس اور فرنٹئیر کانسٹیبلری کے سربراہان کو خصوصی ہدایات جاری کی گئی ہیں۔

یہ احکامات ان اطلاعات کے سامنے آنے کے بعد کیے جا رہے ہیں جن کے مطابق پاکستانی پٹرول ایران اور افغانستان سمگل کیا جا رہا ہے جس سے ملک کے اندر ان مصنوعات کی قیمتیں بحران کا شکار ہیں۔