غیر ریاستی عناصر کے خلاف کارروائی کرنا بھی حکومت پاکستان کی ذمہ داری ہے: امریکی وزیر خارجہ

پاکستان اور بھارت کے دورے کے بعد مختلف امریکی ٹی وی چینلوں کو دیئے گئے انٹرویوز وزیر خارجہ نے کہا کہ اس بارے میں کوئی شبہہ نہیں کہ جن شدت پسندوں نےممبئی میں کئی مقامات پر حملے کیے، وہ اپنی سرگرمیوں کے لیے پاکستانی سرزمین استعمال کر رہے تھے۔

امریکی وزیر خارجہ نے کہا کہ انہوں نے پاکستانی حکومت پر واضح کیا ہے کہ اگر غیر حکومتی عناصر ان حملوں میں ملوث بھی ہیں تو بھی یہ حکومت کی ذمہ داری ہے کہ وہ اپنی سرزمین پر ان کی کارروائیوں کو روکے۔

پاکستان نے ان حملوں کی مذمت کرتے ہوئے اس الزام سے انکار کیا ہے کہ حملوں میں کسی سرکاری ایجنسی کا ہاتھ تھا۔ پاکستان نے تفتیش میں تعاون کا وعدہ کرتے ہوئے ہندوستان سے ثبوت فراہم کرنے کا مطالبہ بھی کیا ہے۔

محترمہ رائس چھبیس نومبر کے حملوں کے بعد ہندوستان اور پاکستان کا دورہ کرکے واشنگٹن لوٹی ہیں۔

شواہد کافی مل چکے ہیں  ممبئی بم حملوں کے بارے میں کافی شواہد جمع کئے جا چکے ہیں۔ اس لئے ثبوت کا حصول اب مسئلہ نہیں ہے۔ اصل بات ان کا تبادلہ ہے اور اس پر کارروائی کرنا ہے۔ پاکستان اور بھارت کے درمیان بہت سے طریقہ کار موجود ہیں جس کے ذریعے یہ تبادلہ کیا جا سکتا ہے۔ کونڈو لیزا رائس

انہوں نے کہا کہ ان کے خیال میں اس بات کے ٹھوس ثبوت موجود نہیں ہیں کہ حملوں میں پاکستانی حکومتی اہلکار ملوث تھے۔

اس سے قبل فاکس نیوز کو ایک انٹرویو دیتے ہوئے انہوں نے کہا کہ امریکہ نے ہندوستان اور پاکستان دونوں کو ممکنہ حملے کے بارے میں معلومات فراہم کی تھی۔

’ میں نے پاکستان پر یہ بالکل واضح کردیا ہےکہ ہم مکمل تعاون اور ٹھوس کارروائی کی توقع کرتے ہیں۔ اور ہاں اس سے ہمارے اور پاکستان کے تعلقات متاثر ہوسکتےہیں۔‘

ممبئی پولیس کا الزام ہے کہ حملے ممنوعہ تنظیم لشکر طیبہ نے کیے تھے لیکن محترمہ رائس نے یہ واضح نہیں کیا کہ آیا امریکہ اس بات سےاتفاق کرتا ہے یا نہیں۔

پاکستان کے دورے پر انہوں نے کہا تھا کہ ممبئی حملوں کی تحقیقات اور ذمہ داروں کے خلاف فوری اور شفاف کارروائی کا عملی مظاہرہ ہونا چاہیئے۔

امریکی وزیر خارجہ نے اپنے مختصر قیام کے دوران صدر آصف زرداری، وزیر اعظم یوسف رضا گیلانی اور پاکستان کے بری فوج کے سربراہ جنرل اشفاق پرویز کیانی سے ملاقات کی تھی۔