ارمان صابر بی بی سی اردو ڈاٹ کام، کراچی

کراچی کے غربی زون کے ڈی آئی جی علیم جعفری کو برطرف کرکے سردار عبدالمجید نئے ڈی آئی جی غربی مقرر

محکمۂ داخلہ کے ترجمان کے مطابق سنیچر سے اب تک کی پرتشدد کارروائیوں میں 24 افراد ہلاک اور 113 زخمی ہوئے ہیں جبکہ پولیس نے 141 شرپسند افراد کو گرفتار کرکے ان کے قبضے سے سولہ پستول برآمد کیے ہیں۔

ترجمان کے مطابق بعض علاقوں میں ہنگامہ آرائی کے دوران بتیس گاڑیوں، اٹھارہ دکانوں، تین ریستوران اور چار جھگیوں کو نذرِ آتش بھی کیا گیا ہے۔

ہنگامہ آرائی پر قابو پانے میں ناکامی پر صوبائی حکومت نے شہر کے شدید متاثرہ حصے غربی زون کے ڈی آئی جی کو برطرف کر دیا ہے۔

کشیدگی کے باعث شہر میں پیر کو بھی ٹرانسپورٹ پوری طرح بحال نہیں ہوسکی جس کی وجہ سے خاص طور پر صبح کے وقت بس سٹاپوں پر لوگوں کا رش تھا جب کہ سڑکوں پر ٹریفک بھی معمول سے کم رہا۔

حکومت سندھ نے پیر کو تمام سرکاری اور نجی تعلیمی اداروں میں تعطیل کا اعلان کیا تھا جس کی وجہ سے تعلیمی ادارے بھی بند رہے جبکہ سرکاری اور نجی دفاتر اور صنعتوں میں حاضری معمول سے کم رہی۔

بسوں اور منی بسوں کے مالکان کی تنظیم کراچی ٹرانسپورٹ اتحاد کے سربراہ ارشاد بخاری نے بی بی سی کو بتایا کہ اس وقت صرف پچیس فیصد ٹرانسپورٹ سڑکوں پر چل رہی ہے۔ ان کے بقول ہنگاموں کے دوران اب تک بیس سے زائد بسوں اور منی بسوں کو نذرِ آتش کردیا گیا ہے اور بس مالکان خوف کا شکار ہیں اس لیے وہ اپنی گاڑیاں نہیں نکال رہے ہیں۔

اس وقت صرف پچیس فیصد ٹرانسپورٹ سڑکوں پر چل رہی ہے۔ ہنگاموں کے دوران اب تک بیس سے زائد بسوں اور منی بسوں کو نذرِ آتش کردیا گیا ہے اور بس مالکان خوف کا شکار ہیں اس لیے وہ اپنی گاڑیاں نہیں نکال رہے ہیں۔ ارشاد بخاری

انہوں نے دعویٰ کیا ’حکومت اور قانون نافذ کرنے والے اداروں کے نمائندے موجودہ صورتحال پر خاموش تماشائی بنے ہوئے ہیں اور لگتا ہے کہ جیسے یہ سب ملی بھگت سے ہو رہا ہے۔‘

پیر کو صوبائی وزارت داخلہ نے قانون نافذ کرنے والے اداروں کو مسلح شرپسندوں کو دیکھتے ہی گولی مارنے کا اختیار دینے کا باقاعدہ نوٹیفکیشن جاری کردیا ہے۔ صوبائی وزیر داخلہ ڈاکٹر ذوالفقار مرزا نے سنیچر کو سکیورٹی فورسز کو یہ اختیار دینے کا اعلان کیا تھا۔

محکمہ داخلہ کے ترجمان کے مطابق ہنگامہ آرائی میں شہر کا شدید متاثرہ حصہ پولیس کا غربی زون ہے اور وہاں حالات پر قابو پانے میں ناکامی پر علاقے کے ڈی آئی جی علیم جعفری کو برطرف کر کے سردار عبدالمجید کو نیا ڈی آئی جی غربی مقرر کرنے کا فیصلہ کرلیا گیا ہے۔

واضح رہے کہ اتوار کی رات صوبائی حکومت نے موٹر سائیکل پر ڈبل سواری پر تین روز کے لیے پابندی عائد کردی تھی جبکہ تمام تعلیمی ادارے پیر کو بند رکھنے کا اعلان بھی کیا گیا تھا۔

بنارس کالونی اور اس سے ملحقہ علاقے اورنگی ٹاؤن میں اب بھی گڑبڑ ہے اور تین دنوں کی ہنگامہ آرائی کے دوران مرنے والوں کی تعداد اکیس تک پہنچ چکی ہے جبکہ ان واقعات میں پچاسی افراد زخمی ہوئے ہیں وسیم احمد

کراچی پولیس کے سربراہ وسیم احمد کے مطابق بنارس کالونی اور اس سے ملحقہ علاقے اورنگی ٹاؤن میں اب بھی گڑبڑ ہے اور تین دنوں کی ہنگامہ آرائی کے دوران مرنے والوں کی تعداد اکیس تک پہنچ چکی ہے جبکہ ان واقعات میں پچاسی افراد زخمی ہوئے ہیں۔

انہوں نے کہا کہ متاثرہ علاقوں میں امن و امان کے لیے قانون نافذ کرنے والے اداروں کی اضافی نفری تعینات کر دی گئی ہے۔

ہنگامہ آرائی کے دوران مرنے والوں کی لاشوں کو سول، جناح، قطر، اور عباسی شہید ہسپتال پہنچایا گیا ہے جہاں کے حکام کے مطابق مرنےوالوں کی تعداد اکیس ہے۔

شہر کے ایک حصے میں ہنگامہ آرائی کا اثر اب بھی پورے شہر پر نظر آ رہا ہے اور شہر میں خوف و ہراس کا عالم برقرار ہے۔