عبادالحق بی بی سی اردو ڈاٹ کام، لاہور

کراچی کے غربی زون کے ڈی آئی جی علیم جعفری کو برطرف کرکے سردار عبدالمجید نئے ڈی آئی جی غربی مقرر

کمیشن کے معاون چئر پرسن اقبال حیدر نے اپنے ایک بیان میں کہا کہ کراچی میں گزشتہ دنوں بلا امتیاز تشدد اور جان و مال کا نقصان حقیقی خطرے کی علامت ہے۔ ان کا کہنا ہے کہ کراچی میں حکومتی اداروں کے علاوہ شہریوں نے جس بڑے پیمانے پر ہتھیاروں کا استعمال کیا ہے وہ نہایت افسوسناک ہے۔

ان کے بقول حساس علاقوں میں نیم فوجی دستوں کی تعیناتی سے صورت حال کو کنٹرول کرنا وقت کی ضرورت ہے لیکن کہ ’دیکھتے ہی گولی مار دینے‘ کے احکام تشدد کی اصل وجوہات کا علاج نہیں ہے۔

انہوں نے کہا کہ حکومت شہر کو اسلحے سے حقیقی اور غیر متعصبانہ طریقے سے پاک کرے اور بقول ان کے حکومت اس مقصد کے حصول میں اسی صورت میں کامیاب ہوسکتی ہے اگر وہ تمام شہریوں پر اپنی اس صلاحیت کو ثابت کرے کہ وہ سب بلا امتیاز تحفظ فراہم کرنے کی اہلیت رکھتی ہے۔

سید اقبال حیدر نے کہا کہ اس میں کوئی شک نہیں کہ طالبانائزیشن نہ صرف کراچی بلکہ پورے ملک کے لیے خطرہ ہے لیکن اس کی وجہ سے گروہی اور لسانی تشدد کو ہوا دینے کا کوئی جواز نہیں۔

ان کا کہنا ہے کہ پاکستان کا دستور ہر شہری کو یہ حق دیتا ہے کہ وہ اپنی آزاد مرضی سے ملک کے کسی بھی حصے میں رہائش اختیار کرسکے اور اس حق پر کوئی مصالحت نہیں ہوسکتی۔

انہوں نے کہا کہ اگر من پسند افراد یا گروہوں کے انتخاب سے اجتناب نہ کیا گیا تو نتائج انتہائی تباہ کن ہونگے۔