عزیزاللہ خان بی بی سی اردو ڈاٹ کام، کوئٹہ

	ایف ڈبلیو او کے اہلکار تنخواہوں کی مد میں بیالیس لاکھ روپے نکلوا کر کیمپ جا رہے تھے

پولیس کے مطابق اغوا کارروں نے کچھ فاصلے پر اہلکاروں اور گاڑیوں کو چھوڑ دیا۔

یہ واقعہ سوموار کی دوپہر کو اس وقت پیش آیا ہے جب فوج کے تعمیراتی ادارے ایف ڈبلیو او کے اہلکار نیشنل بینک سوراب سے تنخواہوں کی مد میں بیالیس لاکھ روپے نکلوا کر سوراب پنجگور روڈ پر گدر کے مقام پر اپنے کیمپ کی طرف جا رہے تھے۔

سوراب پولیس تھانے سے اہلکاروں نے بتایا ہے کہ چھ گاڑیوں میں سوار مسلح افراد دو گاڑیوں میں سوار فوج کے ان اہلکاروں کو اسلحے کی نوک پر ساتھ لےگئے لیکن کچھ دور جانے کے بعد مسلح افراد نے تمام اہلکاروں کو رہا کر دیا۔

یہ اہلکار فوج کے تعمیراتی ادارے ایف ڈبلیو او میں کام کرتے ہیں اور سکیورٹی پر معمور تھے۔ ایف ڈبلیو او کے پاس پاکستان میں سڑکوں کی تعمیر کے کئی ٹھیکے ہیں۔ یہاں کوئٹہ کراچی شاہراہ پر سوراب بسیمہ روڈ پر بھی ایف ڈبلیو او کے اہلکار کام کر رہے ہیں۔

بلوچستان کی مختلف شاہراہوں پر گاڑیوں بسوں اور کوچز پر ڈکیٹی اور لوٹ مار عام ہے اور آئے روز یہاں ٹرانسپورٹرز اور مسافر احتجاج کرتے رہتے ہیں۔