عزیزاللہ خان بی بی سی اردو ڈاٹ کام، کوئٹہ

	بلوچستان میں مسلحہ تنظیموں نے فائر بندی کا اعلان کر رکھا ہے

سوئی سے پولیس اہلکاروں نے بتایا ہے کہ اتوار کی صبح سوئی اولڈ بازار کے چوک پر چائے کے ہوٹل کے قریب یہ دھماکہ ہوا ہے۔

پولیس کے مطابق دھماکہ خیز مواد ایک موٹر سائیکل پر نصب کیا گیا تھا اور دھماکہ ریموٹ کنٹرول سے کیا گیا ہے۔ ایسی اطلاعات ہیں کہ ایک زخمی کی حالت انتہائی تشویشناک ہے۔

دریں اثناء اپنے آپ کو کالعدم تنظیم بلوچ ریپبلکن آرمی کا ترجمان ظاہر کرنے والے سرباز بلوچ نامی شخص نے ٹیلیفون پر اس حملے کی ذمہ داری اپنی تنظیم کی جانب سے قبول کی ہے۔ ان کا کہنا ہے کہ انہوں نے سرکاری حمایت یافتہ وڈیرہ محمد شہی کو نشانہ بنایا ہے جس میں محمد شہی کا ایک ساتھی ہلاک اور وہ خود زخمی ہوئے ہیں۔

سرکاری سطح پر ہلاکت کی تصدیق نہیں ہوسکی ہے۔ سرباز بلوچ کے مطابق دھماکہ اس وقت ہوا ہے جب وڈیرہ محمد شہی کی گاڑی اس چوک پر پہنچی۔

ڈیرہ بگٹی اور اس کے قریب اضلاع نصیر آباد اور جعفرآباد میں اس طرح کے ٹارگٹ کلنگ کے واقعات میں اضافہ ہوا ہے۔ سرباز بلوچ نے گزشتہ دو ہفتوں کے دوران اپنی تنظیم کی جانب سے چار حملوں کی ذمہ داری تنظیم قبول کی ہے۔

ٹارگیٹ کلنگ کے ان اقعات میں ڈیرہ بگٹی میں ممدو نامی شحص کو ریموٹ کنٹرول دھماکے سے ہلاک اور ان کے دو ساتھیوں کو زخمی کیا گیا۔اس کے علاوہ سوئی کے قریب وڈیرہ ملوک کو فائرنگ کرکے ہلاک کیا گیا ہے جبکہ پیر کوہ کے قریب رحمیو اور کریمو نامی دو افراد کے مکان میں دستی بم پھینکا گیا ہے لیکن دونوں محفوظ رہے ہیں۔ سرباز بلوچ کےمطابق ایک ہفتہ پہلے ڈیرہ مراد جمالی میں دوتا چاکرانی کو فائرنگ کرکے ہلاک کیا گیا تھا۔

بلوچستان میں مسلحہ تنظیموں نے فائر بندی کا اعلان کر رکھا ہے لیکن اس اعلان کے وقت ان تنظیموں کے ترجمان نے کہا تھا کہ ان لوگوں کے خلاف کارروائی جاری رہے گی جو سرکاری کےحمایتی بن گئےہیں یا ان کی مخبری کرتے ہیں۔