عزیزاللہ خان بی بی سی اردو ڈاٹ کام، کوئٹہ

	بلوچستان میں فوج کو مزاحمت کا سامنا ہے

وڈیرہ بہاءالدین ماضی میں نواب اکبر بگٹی کے حمایتی رہے ہیں لیکن ڈیرہ بگٹی میں فوجی آپریشن شروع ہونے کے بعد سرکار کی حمایت شروع کر دی تھی۔

سنیچر کے روز دوپہر کے بعد نامعلوم افراد نے فائرنگ کرکے انہیں اور ان کے ایک محافظ وحید کو ہلاک کر دیا ہے جبکہ ایسی اطلاعات ہیں کہ نامعلوم افراد ایک شخص کو اغواء کر کے ساتھ لے گئے ہیں۔

پولیس کے مطابق یہ واقعہ سوئی سے کوئی پندرہ کلومیٹر دور ڈاڈی شاری دربار کے پاس پیش آیا ہے۔

دریں اثنا„ء اپنے آپ کوکالعدم تنظیم بلوچ ریپبلکن آرمی کا ترجمان ظاہر کرنے والے سرباز بلوچ نامی شخص نے ٹیلیفون پر اس حملے کی ذمہ داری اپنی تنظیم کی جانب سے قبول کی ہے۔ سرباز بلوچ کے مطابق بہاءالدین بگٹی سرکار کا حمایتی تھا اور مزاحمت کاروں کی مخبری کیا کرتا تھا۔

حال میں ڈیرہ بگٹی اور اس کے قریب اضلاع نصیر آباد اور جعفرآباد میں اس طرح کی ٹارگٹ کلنگ کے واقعات میں اضافہ ہوا ہے۔

سرباز بلوچ نے گزشتہ ایک ہفتے کے دوران چار حملوں کی ذمہ داری اپنی تنظیم کی جانب سے قبول کی ہے۔ ان واقعات میں ڈیرہ بگٹی میں ممدو نامی شحص کو ریموٹ کنٹرول دھماکے سے ہلاک اور ان کے دو ساتھیوں کو زخمی کیا گیا ہے۔

اس کے علاوہ سوئی کے قریب وڈیرہ ملوک کو فائرنگ کرکے ہلاک کیا گیا ہے جبکہ پیر کوہ کے قریب رحمیو اور کریمو نامی دو افراد کے مکان میں دستی بم پھینکا گیا ہے لیکن دونوں محفوظ رہے ہیں۔

سرباز بلوچ کےمطابق ایک ہفتہ پہلے ڈیرہ مراد جمالی میں دوتا چاکرانی کو فائرنگ کرکے ہلاک کیا گیا تھا۔

بلوچستان میں مسلح تنظیموں نے فائر بندی کا اعلان کر رکھا ہے۔ لیکن اس اعلان کے وقت ان تنظیموں نے کہا تھا کہ ان لوگوں کے خلاف کارروائی جاری رہے گی جو سرکار کے حمایتی بن گئے ہیں اور ان کی مخبری کرتے رہتے ہیں۔