ہارون رشید بی بی سی اردو ڈاٹ کام، اسلام آباد

	’الفا‘ نامی تجارتی کشتی پانامہ کی ہے: پاکستان نیوی

پاکستانی جہازوں کو پکڑ لیا گیا

وائس ایڈمرل آصف ہمایوں نے ایک بیان میں بھارتی الزامات کو مسترد کرتے ہوئے کہا کہ ’ایم وی الفا‘ اور ’الکبیر‘ نامی جن پاکستان بحری جہازوں کو پکڑنے کا دعویٰ بھارتی بحریہ کر رہی ہے دراصل اس نام کا کوئی جہاز پاکستان نیوی میں شامل نہیں۔

واضح رہے کہ بھارتی حکومت کا کہنا ہے کہ ممبئی حملوں کی ابتدائی تحقیقات سے حملہ آوروں کا کراچی سے تعلق دکھائی دے رہا ہے۔ اس بابت میڈیا میں بھارتی بحریہ کے اہلکاروں کے حوالے سے یہ خبر بھی سامنے آئی ہے کہ انہوں نے دو پاکستانی بحری جہاز حراست میں لیے ہیں۔

پاکستان بحریہ کے ترجمان نے واضح کیا کہ ’الفا‘ نامی تجارتی کشتی پانامہ کی ہے اور اس کا پاکستان سے کوئی تعلق نہیں۔

بھارتی نیوی اور کوسٹ گارڈز نے الزام عائد کیا تھا کہ ممبئی پر حملے میں ملوث افراد انہیں کشتیوں کے ذریعے کراچی سے آئے تھے۔ اس حملے کے بعد سے بھارتی نیوی نے تمام سمندری راستوں کی کڑی نگرانی شروع کر دی ہے۔

پاکستان بحریہ نے بھارتی بحریہ کی جانب سے الزامات کو پاکستان پر عائد کرنے کو اپنی ناکامی کا ملبہ پاکستان پر ڈالنا قرار دیا۔ ترجمان کا کہنا تھا کہ بھارتی بحریہ کی صلاحیتوں کا اندازہ اس امر سے بخوبی لگایا جاسکتا ہے کہ گزشتہ دنوں اس نے تھائی لینڈ کے ایک فشنگ ٹرالر کو بحری قزاق قرار دیتے ہوئے ڈبو دیا تھا۔

’اگر ایک بحریہ سویلین جہاز اور قزاقوں میں فرق نہیں کرسکتی تو وہ اور کیا کرسکتی ہے۔‘

بھارتی بحریہ کی صلاحیتوں کا اندازہ اس امر سے بخوبی لگایا جاسکتا ہے کہ گزشتہ دنوں اس نے تھائی لینڈ کے ایک فشنگ ٹرالر کو بحری قزاق قرار دیتے ہوئے ڈبو دیا تھا۔ اگر ایک بحریہ سویلین جہاز اور قزاقوں میں فرق نہیں کرسکتی تو وہ اور کیا کرسکتی ہے۔ پاک بحریہ

’لیکن اگر کسی جہاز پر شک ہو یا پہلے سے خفیہ معلومات ہوں تو تب ہی ان کی تلاشی لی جاتی ہے۔ تاہم کسی بڑے جہاز کے کراچی بندرگاہ سے اس مقصد کے ساتھ جانا ممکن نہیں ہے۔‘

کراچی کی بندرگاہ پر جہازوں کی آمد و رفت کا انتظام رکھنے والی کراچی پورٹ ٹرسٹ کی ویب سائٹ پر گزشتہ چند دنوں میں ’الفا‘ اور ’الکبیر‘ نامی جہازوں کے آمد ورفت کا ذکر نہیں ہے۔

بعض سکیورٹی اہلکاروں کے مطابق روزانہ بیسیوں بحری جہاز اس مصروف بندرگاہ سے آتے جاتے رہتے ہیں۔ بڑے جہازوں کی آمدو رفت تو ایک انتظام کے تحت جاری رہتی ہے لیکن فشنگ بوٹس کی آمد ورفت کو منظم طریقے سے چلانا ممکن نہیں۔ تاہم اس مقصد کے لیے پاکستانی کوسٹ گارڈز اور نیوی کی چوکیاں موجود ہیں۔

بعض مبصرین کے مطابق کئی غیرمعروف راستے ایسے بھی ہیں جو اکثر کشتیوں کے ناخدا سکیورٹی اداروں سے بچنے کی خاطر استعمال کرتے رہتے ہیں۔ ان راستوں کی مکمل نگرانی ممکن نہیں۔