ریاض سہیل بی بی سی اردو ڈاٹ کام، کراچی

	عدالت نے خانانی اور کالیا کی ضمانت کی درخواست پر 25نومبر کے لیے نوٹس جاری کردیے

جاوید خانانی کو لاہور اور مناف کالیا کو کراچی سے گرفتار کیا گیا تھا۔ کراچی میں بھی غیر قانونی طریقے سے کرنسی کی باہر منتقلی کے الزام میں مقدمہ دائر ہونے کے بعد انہیں لاہور سے کراچی لایا گیا ہے۔

دوسری طرف جاوید خانانی اور مناف کالیا کی ضمانت کے لیے کراچی کی ایک مقامی عدالت میں درخواست دائر کی گئی ہے اور عدالت نے پچیس نومبر کے لیے نوٹس جاری کردیے ہیں۔

ڈسٹرکٹ اینڈ سیشن جج جنوبی فہیم الدین کی عدالت میں جاوید خانانی اور مناف کالیا کی جانب سے ان کے وکیل رضا ہاشمی نے ضمانت کی درخواست دائر کی۔ اس درخواست میں موقف اختیار کیا گیا ہے کہ فارن ایکسچینج ریگولیشن اور الیکٹرانک ٹرانزیکشن ایکٹ کے تحت دائر اس مقدمے میں ملزمان پر عائد الزامات قابل دست اندازی پولیس نہیں اور نہ ہی فارن کرنسی کے معاملات میں فوجداری قوانین کے تحت کارروائی ہو سکتی ہے۔

درخواست گذار کے مطابق سٹیٹ بینک بھی الیکٹرانک ٹرانزیکشن ایکٹ کے تحت کرنسی کی منتقلی میں مداخلت نہیں کر سکتی۔

رضا ہاشمی نے عدالت سے استدعا کی ہے کہ ان کے موکلوں کی ضمانت منظور کی جائے تاکہ وہ باہر آ کر اپنا قانونی دفاع کر سکیں۔ عدالت نے اس درخواست پر پچیس نومبر کے لیے ایف آئی اے حکام کو نوٹس جاری کردیے ہیں۔

دوسری جانب مشیر داخلہ رحمان ملک نے کراچی میں فاریکس ایسوسی ایشن کے نمائندوں سے ملاقات کی ہے۔ تنظیم کے سربراہ ملک بوستان کا کہنا ہے کہ وہ مشیر داخلہ کی یقین دہانیوں سے مطمئن ہیں۔