عبادالحق بی بی سی اردو ڈاٹ کام، لاہور

	مناف کالیا کو پیر کی شام کراچی سے لاہور لایا گیا تھا

مناف کالیا پاکستان کی بڑی فارن ایکسچینج کمپنی خانانی اینڈ کالیا کے ڈائریکٹر ہیں اور ان کے علاوہ اس مقدمے میں اس کمپنی کے دوسرے ڈائریکٹر جاوید خانانی اور گوجرانوالہ کی ایک منی ایکچسچینج کمپنی دنیا انٹرپرائز سے تعلق رکھنے والے دو افراد بھی زیرِ حراست ہیں۔

خیال رہے کہ پیر کو ایف آئی اے کراچی نے مناف کالیا کو مقامی عدالت میں پیش کیا تھا اور عدالت نے ایف آئی اے کی درخواست پر مناف کالیا کو سفری ریمانڈ دیتے ہوئے انہیں تفتیش کے لیے کراچی سے لاہور منتقل کرنے کی اجازت بھی دی تھی۔

عدالت کے احکامات کے تحت ایف آئی اے نے پیر کی شام کو ہی مناف کالیا کو ہوائی جہاز کے ذریعے کراچی سے لاہور منتقل کردیا تھا۔

منگل کی صبح ایف آئی اے لاہور نے مناف کالیا کو ضلع کہچری لاہور میں سپیشل میجسٹریٹ کے سامنے پیش کیا اور تفتیش کے لیے ان کا ریمانڈ مانگا جس پر سپیشل مجسریٹ فیصل جمیل نے چھ دن کا ریمانڈ دیتے ہوئے انہیں تفتیش کے لیے ایف آئی اے کی تحویل میں دے دیا۔

عدالت نے ایف آئی کو ہدایت کی کہ مناف کالیا کو سترہ نومبر کو دوبارہ عدالت میں پیش کیا جائے۔ واضح رہے کہ ایف آئی اے لاہور پہلے ہی اسی کمپنی کے ایک دوسرے ڈائریکٹر جاوید خانانی سمیت دیگر ملزموں کا عدالت سے چار دن کا ریمانڈ لے کر ان سے چھان بین کررہی ہے۔

اس مقدمے کی تحقیقات کرنے والے ایف آئی اے کے ڈائریکٹر اعظم جوئیہ کے مطابق ان افراد کے خلاف فارن ایکسچینج ریگولیشن ایکٹ اور الیکٹرانک آرڈینینس کے تحت مقدمہ درج کیا گیا ہے۔ انہوں نے کہا کہ ’ملزمان کی فرنچائزڈ کمپنیاں ہنڈی کے کاروبار میں ملوث ہیں‘

یاد رہے کہ ایف آئی اے کے اہلکاروں نےگوجرانوالہ میں فارن ایکسچینج کرنسی کمپنی کے ایک آفس پر چھاپہ مارکر وہاں سے لاکھوں روپے کی مالیت کی غیر ملکی کرنسی کے علاوہ کمپیوٹر اور دیگر دستاویز برآمد کر کے رُستم علی خان اور طارق محمود نامی افراد کوگرفتار کیا تھا اور ان کی نشاندہی پر مناف کالیا اور جاوید خانانی کوگرفتار کیا گیا۔

کے اینڈ کے یعنی خانانی اینڈ کالیا انٹرنیشنل پاکستان میں فارن کرنسی ایکسچینج کا کاروبار کرنے والی سب سے بڑی کمپنی ہے اور پاکستان میں فارن کرنسی ایکسچینج کے کاروبار پراس کمپنی کاچالیس فیصد کنٹرول ہے۔