دلاور خان وزیر بی بی سی اردو ڈاٹ کام، پشاور

سور کام کے علاقے سے آٹھ اور چیجی بازار کے علاقے تین گاڑیاں اغوا کی گئیں

سامان کے کنٹینروں کے ساتھ اغوا ہونے والے چھبیس افراد ٹرک ڈرائیور اور کلینر ہیں۔

پولیٹکل انتظامیہ کے ایک اہل کار نے بی بی سی کو بتایا ہے کہ پہلی گاڑی خیبر ایجنسی کی تحصیل جمرود کے علاقے وزیر ڈانڈ سے اغوا کی گئی جس کے بعد سور کام کے علاقے سے آٹھ اور چیجی بازار کے علاقے سے تین گاڑیاں اغوا کی گئیں۔

ان واقعات کے بعد پولیٹیکل انتظامیہ نے مختلف علاقوں کی ناکہ بندی کر دی ہے لیکن آخری اطلاعات ملنے تک اغواء کیے جانے والے افراد اور ٹرکوں کے بارے میں کوئی اطلاع نہیں مل سکی تھی۔

پولیٹیکل اہلکار کے مطابق اغواء کی جانے والی گاڑیوں میں خورد و نوش کی مختلف اشیاء سمیت دیگر ضروری سامان بھی تھا۔ ان کے مطابق اس واقعے کے بعد پولیٹیکل انتظامیہ نے خاصہ دار اور سکاؤٹس فورس کے دستوں کو مختلف علاقوں پر تعینات کر دیا ہے اور خیبر ایجنسی کے قبائلی عمائدین سے بھی رابطے قائم کیے جا رہے ہیں۔

واضح رہے کہ خیبر ایجنسی افغانستان اور پاکستان کے درمیان نقل و حمل کا اہم راستہ ہے اور اس راستے سے افغانستان کو مختلف اشیاء ترسیل کی جاتی ہے۔افغانستان میں پاکستان کے سفیر طارق عزیزالدین کو بھی اسی راستے سے افغانستان جاتے ہوئے اغواء کیا گیا تھا۔

پاکستان اور اس کے قبائلی علاقوں میں نیٹو افواج کے لیے سامان لے جانے والے ٹرکوں کے خلاف کارروائی کا یہ پہلا واقعہ نہیں اور خیبر ایجنسی کے علاقے میں پہلے بھی نیٹو افواج کے لیے سامان لے جانے والے کئی ٹرکوں کو اغوا کر لیا گیا تھا۔

اس کے علاوہ چند ماہ قبل نیٹو افواج کے لیے درآمد کردہ بکتر بندگاڑیاں ایک ٹرالر کے ذریعے افغانستان جانے کے لیے کراچی بندرگاہ کے قریب ماری پور ٹرک سٹینڈ پر تیار کھڑی تھیں اور چند نامعلوم افراد نے ٹرالر کو آگ لگا دی تھی جس کے باعث بکتر بند گاڑیوں کو بھی نقصان پہنچا تھا۔