عبدالحئی کاکڑ بی بی سی اردو ڈاٹ کام، پشاور

	لوگوں کا کہنا تھا کہ سکیورٹی فورسز کو مزاحمت کا سامنا کرنا پڑا اور نہ ہی کوئی اہم گرفتاری عمل میں آئی

خیبر ایجسنی کے حکام کا کہنا ہے کہ یہ واقعہ منگل کی شب سوا نو بجے اس وقت پیش آیا ہے جب نامعلوم مسلح افراد نے چترال اسکاؤٹس سے تعلق رکھنے والے اہلکاروں کی گاڑی پر فائرنگ کی۔ ان کے بقول حملے میں تین اہلکار ہلاک جبکہ دو زحمی ہوگئے ہیں۔

انہوں نے مزید بتایا کہ سکیورٹی فورسز کے اہلکار اپنی گاڑی میں تحصیل باڑہ میں ملبٹ ایف سی قلعے واپس جارہے تھے کہ گاڑی میں سوار مسلح افراد نے آکا خیل کے مقام پر ان پر حملہ کردیا۔ اہلکار کے مطابق مبینہ حملہ آور کی گاڑی باڑہ کی طرف جاتے ہوئےدیکھی گئی ہے۔

بارہ روز قبل سکیورٹی فورسز نے تحصیل باڑہ میں لشکرِ اسلام کے خلاف آپریشن شروع کیا تھا تاہم انہیں پہلی مرتبہ حملے کا نشانہ بنایا گیا ہے۔تاہم ابھی تک کسی نے بھی اس حملے کی ذمہ داری قبول نہیں کی ہے۔

مقامی شدت پسند تنظیم لشکرِ اسلام نے کارروائی کے آغاز ہی میں سکیورٹی فورسز کے خلاف مزاحمت نہ کرنے کا اعلان کیا تھا۔ قبائلی جرگے کے فعال ہونے کے بعد حکومت نے کارروائی غیر اعلانیہ طور پر روک کر کرفیو ہٹادیا تھا۔

حکومت اور لشکرِ اسلام کے درمیان اس وقت قبائلی جرگے کی توسط سے مذاکرات جاری ہیں تاہم اس میں ابھی تک کسی قسم کی کوئی پیشرفت نہیں ہوسکی ہے۔

حالیہ ہلاکتوں کے بعد بارہ دنوں کی کارروائی میں ہلاک ہونے والوں کی تعداد چار ہوگئی ہے جس میں تین اہلکاروں سمیت لشکرِ اسلام کا ایک جنگجو شامل ہیں۔