شہزاد ملک بی بی سی اردو ڈاٹ کام، اسلام آباد

	چودھری نثار علی خان نے کہاکہ سرکاری اداروں میں کوئی مالی قواعد و ضوابط نہیں ہے۔

منگل کو پارلیمنٹ ہاؤس میں پبلک اکاؤنٹس کمیٹی کے اجلاس کی صدارت کرتے ہوئے انہوں نے کہاکہ سرکاری اداروں میں کوئی مالی قواعد و ضوابط نہیں ہیں۔

وزارت مواصلات کے ادارے نیشنل ہائی وے اتھارٹی کے سنہ دو ہزار پانچ اور دو ہزار چھ کی آڈٹ رپورٹ کا جائزہ لیتے ہوئے انہوں نے کہا کہ اس ادارے نےمختلف منصوبوں میں نہ صرف کروڑوں روپے کے گھپلے ہوئے ہیں بلکہ اس ان منصوبوں کے ٹھیکے من پسند فرموں کو دیئے گئے۔

اڈیٹر جنرل نے اس محکمے کے اس عرصےکے دوران ہونے والی آڈٹ رپورٹ بھی کمیٹی کو پیش کی جس میں مختلف منصوبوں پر ساٹھ کروڑروپےکی مالی باعنوانیوں کی نشاندہی کی گئی۔

چوہدری نثار علی خان نے کہا کہ اگر کوئی حاضر سروس فوجی اہلکار اس محکمے میں مالی بدعنوانی میں ملوث ہوا تواُس کے بارے میں آرمی چیف کو لکھا جائے گا جبکہ اگر وہ ریٹائر بھی ہوگیا ہوا تواُس کو کمیٹی کے سامنے پیش ہونا پڑے گا۔

وزارت مواصلات کے ادارے نیشنل ہائی وے اتھارٹی کے سنہ دو ہزار پانچ اور دو ہزار چھ کی آڈٹ رپورٹ کا جائزہ لیتے ہوئے چودھری نثار علی خان نے کہا کہ اس ادارے کے مختلف منصوبوں میں نہ صرف کروڑوں روپے کے گھپلے ہوئے ہیں بلکہ اس ان منصوبوں کے ٹھیکے من پسند فرموں کو دیئے گئے۔

پبلک اکاونٹس کمیٹی کے چیئرمین نے کہا کہ کوہاٹ ٹنل اور اس کے ساتھ بننے والی سڑکوں کا ڈیزائن تبدیل کرنے پر سینتالیس کروڑ روپے خرچ کیے گئے اس کے علاوہ این ایچ اے کے سابق ذمہ داروں نے ایک کروڑ ساٹھ لاکھ روپے مالیت کی چار گاڑیاں منگوائیں گئیں حالانکہ اُس وقت کے وزیر اعظم نے بیرون ملک سے گاڑیاں درامد کرنے پر پاندی عائد کر رکھی تھی۔

چوہدری نثار علی خان نے این ایچ اے کے چیئرمین کو حکم دیا کہ وہ اس بات کی تحقیقات کروائیں کہ یہ گاڑیاں کس کے استعمال میں ہیں۔

اجلاس میں کہا گیا کہ اس بدعنوانی میں ملوث افراد کی نشاندہی کر کے اُن کے خلاف کارروائی کی جائے۔

چوہدری نثار علی خان نے کہا کہ اگر ان افراد کے خلاف آئندہ پندرہ روز میں کارروائی نہ کی گئی تو وہ حکومت کو این ایچ اے کے سربراہ کے خلاف کارروائی کی سفارش کریں گے۔

اجلاس میں آڈیٹر جنرل کی طرف سے پیش کی جانے والی رپورٹ میں کہا گیا کہ اس ادارے نے کراچی میں شاہراہ فیصل پر ٹینڈر کیے بغیر دفتر بنا دیا جس پر نوکروڑ روپے لاگت آئی ہے اور ادارہ اس بات کا کوئی ثبوت فراہم نہیں کرسکا۔

کمیٹی کے چیئرمین نے کہا کہ این ایچ اے پاکستان کے شمالی علاقوں ناران میں ایک ریسٹ ہاؤس بنایا جار ہا ہے جس پر ایک ارب سے زائد لاگت ۔آئے گی۔

اجلاس میں فیصلہ کیا گیا محکمانہ آڈٹ کمیٹی کا اجلاس ہر ماہ ہوا کرے گا اور اس کی رپورٹ پبلک اکاونٹس کمیٹی کو دی جائے گی۔

اجلاس کو بتایا گیا کہ این ایچ اے نے مختلف ترقیاتی منصوبوں میں کروڑوں روپے اضافی دیئے ہیں جن پر کمیٹی کے سربراہ نے این ایچ اے کے چیئرمین اور سکریٹری مواصلات سے کہا کہ وہ ایسے ٹھیکیداروں سے رقم واپس لیں ورنہ اُن کے خلاف کارروائی کے لیے حکومت سے سفارش کی جائے گی۔

چوہدری نثار علی خان نے کہا کہ نیشنل ہائی وے اتھارٹی نے یاست کے اندرریاست بنا رکھی ہے جس کی اجازت نہیں دی جائے گا اور ذمہ داروں کے خلاف کارروائی کی جائے گی۔ کمیٹی کا اجلاس بدھ کو بھی جاری رہے گا جس میں دیگر سرکاری اداروں میں ہونے والی مالی بےضابطگیوں کا جائزہ لیا جائے گا۔