آصف فاروقی بی بی سی اردو ڈاٹ کام، اسلام آباد

	قائدِ حزب اختلاف چوہدری نثار علی خان کو پہلے ہی پبلِک اکاؤنٹس کمیٹی کا سربراہ منتخب کیا جا چکا ہے

حکومت کی سابق حلیف جماعت کے جن ارکان کو قومی اسمبلی کی قائمہ کیمٹیوں کے سربراہ کے طور پر منتخب کیا گیا ہے۔ ان میں سے عابد شیر علی کو تعلیم، خرم دستگیر کو کامرس، راجہ محمد اسد خان کو ماحول، ایاز صادق کو ریلوے، اکرم انصاری کو ٹیکسٹائل، عثمان ابراہیم کو خواتین کی ترقی اور مرتضٰی جاوید عباسی کو نارکوٹکس کنٹرول کی قائمہ کمیٹی کا سربراہ چنا گیا ہے۔

پیپلز پارٹی کی اتحادی حکومت اور مسلم لیگ ن کے درمیان ہونے والے معاہدے کے تحت ان انتخابات میں مسلم لیگی امیدواروں کی مخالفت نہیں کی گئی۔

ماہرین بڑی تعداد میں حزب اختلاف سے تعلق رکھنے والے ارکان کو پارلیمنٹ کی قائمہ کمیٹیوں کے سربراہاں منتخب کیے جانے اور حکومت کی جانب سے انکی مخالفت نہ کرنے کو پارلیمانی نظام کے لیے نیک شگون قرار دے رہے ہیں۔

اس سے پہلے قومی اسمبلی کی سب سے اہم سمجھی جانے والی پبلک اکاؤنٹس کمیٹی کا سربراہ چوہدری نثار علی خان کو چنا گیا تھا جنکا تعلق بھی نواز لیگ سے ہے اور جو قائد حزب اختلاف کے منصب پر فائز ہیں۔