شہزاد ملک بی بی سی اردو ڈاٹ کام، اسلام آباد

	چودھری نثار علی خان مسلم لیگ نون کے سینئر نائب صدر بھی ہیں

قومی اسمبلی کی سپیکر ڈاکٹر فہمیدہ مرزا نے قومی اسمبلی میں سابق قائد حزب اختلاف چوہدری پرویز الہی کا استعفی بھی منظور کر لیا ہے۔

پاکستان مسلم قاف کے مرکزی رہنما اور پنجاب کے سابق وزیر اعلی چوہدری پرویز الہی قومی اسمبلی میں قائد حزب اختلاف تھے لیکن پاکستان مسلم لیگ نون کے حکمراں اتحاد سے علیحدہ ہونے اور اُن کی قومی اسمبلی میں زیادہ نشستیں ہونے کی وجہ سے چوہدری پرویز الہی اس عہدے سے مستعفی ہوگئے تھے۔

پاکستان مسلم لیگ نون اس وقت پاکستان پیپلز پارٹی کے بعد قومی اسمبلی میں دوسری بڑی سیاسی جماعت ہے اور اس ایوان میں اُن کے ارکان کی تعداد اکیانوے ہے جبکہ پاکستان مسلم لیگ قاف کے ارکان کی تعداد 54 ہے۔

پاکستان مسلم لیگ نون نے اپوزیشن بینچوں پر اُن کی جماعت کو نشستیں الاٹ کرنے کی درخواست قومی اسمبلی میں پہلے سے ہی جمع کر وارکھی ہے۔

تاہم قومی اسمبلی میں قانون سازی کے محکمے کے اہلکار محمد مشتاق نے بی بی سی کو بتایا کہ پاکستان مسلم لیگ نون کے ارکان کو اپوزیشن بینچوں پر نشستیں صدر آصف علی زرداری کے 20 ستمبر کو پارلیمنٹ کے مشترکہ اجلاس کے بعد الاٹ کی جائیں گی۔

پاکستان مسلم لیگ نون کا کہنا ہے کہ وہ حزب اختلاف میں رہ کر اپنا کردار مؤثر طریقے سے ادا کرے گی ۔ اس کا کہنا ہے کہ وہ قومی امور اور اچھے اقدامات پر حکومت کا ساتھ دے گی اور کسی بھی ایسے عمل کا حصہ نہیں بنے گی جس میں موجودہ حکومت کو غیر مستحکم کیا جائے۔