 | | | عراق میں ان کی حکمت عملی بڑی حد کامیاب رہی |
امریکہ میں صدراتی انتخابات سے صرف دو دن قبل اور امریکی فوج کی سینٹرل کمانڈ کا عہدہ سنبھالنے کے فوری بعد جنرل ڈیویڈ پیٹریئس کے نائب وزیر خارجہ رچرڈ باؤچر کے ہمراہ پاکستان کے دورے نے بہت سے سوالات کو جنم دیا ہے۔ عراق میں گزشتہ کئی برس سے جاری تشدد پر خاطر خواہ حد تک قابو پانے میں کامیابی حاصل کرنے بعد جنرل ڈیویڈ پیٹریئس نے گزشتہ جمعہ کو امریکی سینٹرل کمانڈ کا عہدہ سنبھالا ہے۔ ان کی نئی ذمہ داریوں میں براعظم ایشیا کا ایک بڑا حصہ آتا ہے جس میں افغانستان اور پاکستان بھی شامل ہیں۔ جنرل ڈیویڈ پیٹریئس کا یہ دورہ پاکستان کے شمالی مغربی قبائلی علاقوں پر امریکی فوج کی طرف سے مسلسل میزائل حملوں اور اس کے رد عمل میں پاکستان کی جمہوری حکومت کی طرف سے شدید احتجاج سے بظاہر پاکستان اور امریکہ کے تعلقات میں کشیدگی کو دور کرنے یا خطے میں نئی فوجی حمکت عملی پر عمدرآمد کرنے لیے ہے۔ ان سوالات سے قطع نظر مبصرین کے مطابق جنرل پیٹریئس کے اس اچانک دورے نے دو چیزوں کو واضح کر دیا ہے۔ امریکہ میں ڈیلاویئر یونیورسٹی میں بین الاقوامی امور کے ماہر ڈاکٹر مقتدر نے بی بی سی کے پروگرام جہاں نما کو انٹرویو میں کہا کہ یہ دورہ ایک طرف تو امریکہ کی خارجہ پالیسی میں پاکستان کی اہمیت کو اجاگر کرتا ہے تو دوسری طرف اس سے یہ بات بھی عیاں ہوتی ہے کہ جنرل پیٹریئس خطے میں شدت پسندی کو ختم کرنے میں کس حد تک سنجیدہ ہیں۔ ڈاکٹر مقتدر کے مطابق پاکستان میں جمہوری حکومت کے قیام سے پاکستان اور امریکہ کا رشتہ بدل گیا ہے۔ انہوں نے کہا کہ امریکہ اب پاکستان پر اتنا بھروسہ نہیں کرتا جتنا سابق صدر جنرل مشرف کے دورے حکومت میں کرتا تھا۔
| | | گزشتہ جمعہ کو بھی امریکی ڈرون طیاروں سے قبائلی علاقوں میں دو میزائل داغے گئے جن میں بیس افراد ہلاک ہو گئے تھے |
انہوں نے مزید کہا کہ امریکی پالیسی ساز سمجھتے ہیں کہ ایک طرف تو پاکستان کی حکومت امریکہ سے امداد حاصل کرنا چاہتی ہے اور امریکہ کو استعمال کرنا چاہتی ہے تو دوسری طرف انہیں خدشہ ہے کہ کہیں وہ طالبان سے مفاہمت نہ کر لے۔ انہوں نے کہا کہ امریکہ اس بات سے بہت گھبراتا ہے۔ امریکہ کو ان کے مطابق اس بات کا اندازہ ہو گیا ہے پاکستان کی جمہوری حکومت ایک حد تک ہی امریکہ کا ساتھ دے سکتی ہے۔ ڈاکٹر مقتدر نے کہا کہ امریکہ کو اس بات کا بھی بخوبی اندازہ ہے کہ پاکستان میں شدت پسند کا مسئلہ انتہائی پیچیدہ ہو گیا ہے اور امریکہ جانتا ہے کہ اگر پاکستان امریکی فوجی حکمت عملی پر چلتا رہتا تو پاکستان میں خانہ جنگی کی صورت حال پیدا ہو سکتی تھی۔ اسی حقیقت کے پیش نظر اب امریکہ نے ذہنی طور پر بات کو قبول کر لیا ہے کہ ہر وقت پاکستان کی حکومت کے لیے امریکہ کا ساتھ دینا ممکن نہیں رہا۔ ڈاکٹر مقتد نے کہا کہ پاکستان کے اندر امریکی حملے جاری رہیں گے اور جنرل پیٹرئیس پاکستان کی حکومت کو یہ باوور کرائیں گے کہ امریکہ پاکستان کا ساتھ نہیں چھوڑ سکتا۔ عراق میں امریکی حکمت عملی کے حوالے سے ایک سوال پر ڈاکٹر مقتدر نے کہا کہ جنرل پیٹریئس نے شورش سے نبٹنے کے بارے میں کتاب لکھی تھی۔ اس کتاب میں انہوں نے لکھا تھا کہ دشمن کو کس طرح اپنا لیا جائے۔ اسی حکمت عملی کے تحت عراق میں انہوں نےالقاعدہ کے عراق عناصر کو خرید لیا تھا۔ عراقی قبائل کو بیس بیس تیس تیس ملین ڈالر ماہانہ ادا کیئے اور انہیں خرید لیا۔ اور اس طرح سے انہوں نے القاعدہ کے غیر ملکی جنگجوؤں کو تناہ کر دیا۔ ڈاکٹر مقتدر نے کہاکہ یہی حکمت عملی وہ پاکستان اور افغانستان میں اپنانا چاہ رہے ہیں۔ انہوں نے کہا کہ اس حکمت عملی کے تحت جو لوگ القاعدہ سےصرف تعاون کر رہے اور ان کے ساتھ عملی طور پر شریک نہیں ہیں انہیں القاعدہ سے علیحدہ کرنا چاہ رہے ہیں۔ انہوں نے کہا کہ عین ممکن ہے کہ آنے والے دنوں میں طالبان اور مقامی قبائل کے لیے مختلف ترغیبات کا اعلان کیا جائے۔ تاہم ابھی یہ واضح نہیں کہ یہ حکمت عملی پاکستان اور افغانستان میں کس حد تک کارگر ثابت ہو گئی کیونکہ دونوں ملکوں کے درمیان سرحد بہت کمزور ہے اور لوگ کی آمدورفت روکنا بہت مشکل ہے۔ انہوں نے مزید کہا کہ جنرل پیٹرئیس کا جنرل کیانی سے ملنے کا مقصد ہی یہی ہے کہ وہ اندازہ لگانا چاہ رہے ہیں کہ پاکستان کے پاس کسی حد تک خفیہ معلومات ہیں جن سے القاعدہ کے ساتھ تعاون کرنے والے عناصر کی نشاندھی کی جا سکے اور یہ دیکھا جا سکے کہ کن لوگوں کو پیسے یا دوسری ترغیبات دے کر القاعدہ سے علیحدہ کیا جا سکتا اور کن کو صرف طاقت کے ذریعے ہی ختم کیا جانا ضروری ہے۔ | 
باجوڑ: قبائل اور حکومت میں معاہدہ
