آصف فاروقی بی بی سی ارودڈاٹ کام، اسلام آباد

	وزیراعظم یوسف رضا گیلانی کو امدادی کارروائیوں کے بارے میں تفیصلی بریفنگ دی گئی

زلزلہ زدہ علاقوں میں ہونے والی امدادی کارروائیوں کی مانیٹرنگ کرنے والے ادارے نیشنل ڈیزاسٹر مینجمنٹ اتھارٹی کے سربراہ جنرل فاروق احمد خان نے اتوار کے روز وزیراعظم یوسف رضا گیلانی کو امدادی کارروائیوں کے بارے میں تفیصلی بریفنگ دی۔

اجلاس کے بعد جاری ہونے والے ایک بیان میں کہا گیا ہے کہ وزیراعظم نے جنرل فاروق کو ہدایت کی کہ زلزلہ زدہ علاقوں میں سردی میں شدت آنے سے پہلے امدادی کارروائیوں کو مکمل کیا جائے۔

وزیراعظم کا کہنا تھا کہ متاثرہ علاقوں میں خوراک کی مسلسل فراہمی کو بھی یقینی بنایا جائے۔ بیان کے مطابق اس نکتے پر وزیراعظم نے خصوصی توجہ دینےکی ہدایت کی اور کہا کہ زلزلہ زدہ علاقوں میں کسی قیمت پر بھی خوراک کی قلت نہیں ہونی چاہیئے۔

وزیراعظم نے ایسے عناصر پر بھی کڑی نظر رکھنے کا حکم جاری کیا جو مبینہ طور پر امدادی سامان کی فروخت میں ملوث ہیں۔

بریفنگ میں وزیراعظم کو بتایا گیا کہ ہر متاثرہ خاندان کو زلزلے میں تباہ ہو جانے والے مکانات کی تعمیر کے لیے جستی چادری اور پچیس ہزار روپے فراہم کرنے کا بھی بندوبست کیا جا رہا ہے کیونکہ متاثرین میں تقسیم کئے گئے خیمے آنے والے دنوں میں متوقع برفباری کا مقابلہ کرنے کے لیے کافی نہیں ہیں۔

مشیر داخلہ رحمٰن ملک اور سیکرٹری داخلہ کمال شاہ بھی اس اجلاس میں موجود تھے۔