عزیزاللہ خان
بی بی سی اردو ڈاٹ کام، کوئٹہ |  |
| | | بلوچستان میں آنے والے زلزلے سے پچاس ہزار افراد متاثر ہوئے ہیں |
وزیراعلی پنجاب شہباز شریف جمعہ کو ایک روزہ دورے پر کوئٹہ پہنچ رہے ہیں جہاں وہ زلزلے سے متاثرہ علاقوں میں جائیں گے۔ انہوں نے زلزلہ زدگان کی مدد کے لیے دس کروڑ روپے کا اعلان کیا ہے۔ دریں اثناء سعودی عرب نے زلزلے کے متاثرین کے لیے دس کروڑ ڈالر کی امداد کا اعلان کیا ہے۔ ادھر ہلاکتوں کے حوالے سے متضاد اطلاعات مل رہی ہیں۔ بلوچستان میں محکمۂ صحت کے حکام نے بتایا ہے کہ زیارت کے قریب کواس یونین کونسل کے ہسپتال میں بانوے لاشیں پہنچی تھیں جبکہ دیگر علاقوں میں جو ہلاک ہوئے ہیں اور ان کی تدفین لوگوں نے خود کر دی تھی ان کی تعداد کا علم نہیں ہے۔ صوبائی وزیر مالیات زمرک خان کے مطابق ہلاک ہونے والے افراد کی تعداد دو سو پندرہ ہے جبکہ غیرسرکاری تنظیم بلوچستان کوآرڈینیشن کونسل کے عہدیدار امیر محمد ترین نے بتایا ہے کہ ان کے کارکنوں نے دور دراز علاقوں کے دورے کیے ہیں اور ان کی اطلاعات کے مطابق دو سو پینتالیس افراد ہلاک ہوئے ہیں۔ لیکن اسلام آباد میں بیٹھے حکام یہی دعویٰ کر رہے ہیں کہ ہلاک شدگان کی تعداد دو سو سے کم ہے۔ بلوچستان میں زلزلہ زدگان کی مدد کے لیے حکومت سے زیادہ سیاسی جماعتیں اور قریب واقع دیہاتوں کے مقامی لوگ متحرک ہیں۔ مختلف سیاسی جماعتوں نے کوئٹہ کے علاوہ مختلف شہروں میں امدادی کیمپس لگائے ہیں۔ مسلم لیگ نواز کے جنرل سیکرٹری ایاز سواتی نے بتایا ہے کہ انہوں نے پنجاب اور مقامی طور پر بارہ ٹرک امدادی سامان کے بھجوائے ہیں جبکہ پشتونخواہ ملی عوامی پارٹی، جمعیت علماء اسلام، جماعت اسلامی اور مقامی لوگوں نے بڑی تعداد میں امدادی اشیاء متاثرہ علاقوں میں بھجوائے ہیں۔ | | | شہباز شریف نے متاثرین کی مدد کے لیے دس کروڑ روپے کا اعلان کیا ہے |
کوئٹہ میں لوگوں نے تیسری رات سڑکوں پر جاگ کر گزاری ہے جبکہ کوئٹہ شہر سے بڑی تعداد میں لوگ دیہاتوں میں اپنے رشتہ داروں کے پاس چلے گئے ہیں۔ کوئٹہ شہر میں خوف کا یہ عالم ہے کہ سول ہسپتال میں وارڈ خالی اور مریض کھلے میدانوں میں زمینوں پر علاج کرا رہے ہیں۔ ہسپتال کے صحن میں ٹینٹ اور شامیانوں سے بنائے گئے ہیں۔ زخمیوں نے بتایا ہے کہ وہ خوف کے مارے وارڈ میں نہیں رہتے کیونکہ وقفے وقفے سے زلزلے آ رہے ہیں۔ زخمیوں نے بتایا کہ انہیں یہاں سیاسی جماعتیں امداد فراہم کر رہی ہیں۔ پشتونخواہ ملی عوامی پارٹی کے کارکنوں نے بتایا ہے کہ انہوں نے متاثرہ علاقے میں بڑی تعداد میں امدادی اشیاء پہنچا دی ہیں جبکہ کوئٹہ میں ہسپتال میں زخمیوں کو طبی امداد کے علاوہ ان کے لیے ٹینٹ اور شامیانے لگائے ہیں۔ ادھر زیارت اور خانوزئی سے ملنے والی اطلاعات کے مطابق جن علاقوں میں ٹینٹ اور کمبلیں فراہم کی گئی ہیں وہ ٹینٹ اور کمبلیں یہاں شدید سردی میں کارگر نظر نہیں آرہی ہیں اور ان ٹینٹوں کا معیار بھی اچھا نہیں ہے۔ لوگوں نے بتایا ہے کہ مقامی سطح پر جو رضائیاں لوگوں نے فراہم کی ہیں وہ بہتر ہیں جو مقامی موسم کے حوالے سے بنائی گئی ہیں۔ متاثرین نے بتایا ہے کہ شدید سردی کی وجہ سے بچے اور خواتین متاثر ہو رہے ہیں جن کے لیے ادویات فراہم کی جا رہی ہیں۔ پنجاب کے وزیر اعلی شہباز شریف جمعہ کو کوئٹہ سے ہیلی کاپٹر کے ذریعے زیارت جائیں گے اور وہاں زلزلے سے متاثرہ لوگوں سے ملاقات کریں گے۔ دریں اثناء سعودی عرب کے فرماں روا شاہ عبداللہ نے زلزلے کے متاثرین کے لیے دس کروڑ ڈالر کی امداد کا اعلان کیا ہے۔ پاکستان میں سعودی عرب کے سفیر علی عود الاسیری نے کہا ہے کہ سعودی عرب اور کوئٹہ کے درمیان فضائیہ کے ذریعے براہ راست امداد پہنچائی جائے گی۔ | 
غیر ملکی امداد بھی قبول: شیری 
بلوچستان، زلزلے کا دوسرا دن
