عزیز اللہ خان بی بی سی اردو ڈاٹ کام کوئٹہ

	کوئٹہ میں دھماکے شہر کے مصروف ترین علاقے میں ہوا

کوئٹہ کے پولیس افسر وزیر خان ناصر نے بتایا ہے کہ دھماکہ خیز مواد ایک چھوٹی ایف ایکس گاڑی میں رکھا گیا تھا جس سے ایک رکشہ ڈرائیور اور ایک نامعلوم شخص ہلاک ہوئے ہیں۔

دھماکے سے پانچ گاڑیاں اور چار رکشے جل گئے ہیں جبکہ قریب کھڑی دیگر گاڑیوں کو بھی نقصان پہنچا ہے۔ دھماکہ کوئی ایک بجے کے لگ بھگ ہوا ہے۔

انھوں نے کہا کہ اب تک یہ معلوم نہیں ہوسکا کہ اس دھماکےکے پیچھے کس کا ہاتھ ہے تاہم اس بارے میں تحقیقات کی جا رہی ہیں۔ اس دھماکے کی ذمہ داری تاحال کسی نے قبول نہیں کی ہے۔

عینی شاہدین نے بتایا ہے کہ جیسے ہی دھماکہ ہوا تو وہ دھماکے کی جگہ سے کچھ دور تھے لیکن مٹی اور گاڑیوں کے ٹکڑے ان پر گرے ہیں اور انھیں ایسا لگا جیسے کوئی زور دار ہوا انھیں دھکے دے رہی ہو۔

جس جگہ دھماکہ ہوا ہے اس جگہ کے قریب ضلع کچہری عدالتیں اور گرائمر سکول واقع ہے جبکہ اس سڑک کے دونوں جانب گاڑیاں پارک کی جاتی ہیں اور اس روڈ پر صبح سے سکولوں اور دفاتر کی چھٹی کے وقت تک کافی رش رہتا ہے اور ٹریفک بلاک رہتی ہے۔ لیاقت پارک ضلعی حکومت کے زیر انتظام ہے اور یہ فیمیلیز کے لیے ہی مختص ہے ۔

دھماکے کے بعد پولیس نے علاقے کو گھیرے میں لے لیا اور فائر بریگیڈ کی گاڑیاں دھماکے سے آٹو رکشہ اور گاڑیوں کو لگنے والی آگ بجھاتی رہیں جبکہ بڑی تعداد میں لوگ جمع ہو گئے تھے جنھیں لاؤڈسپیکر پر اعلان کرکے دھماکے جگہ سے دور رہنے کی تاکید کی جاتی رہی۔ پولیس حکام کے مطابق کوئٹہ میں پہلی مرتبہ ایسا دھماکہ خیز مواد استعمال کیا گیا ہے جس سے آگ بھڑک اٹھی ہے اور بڑی تعداد میں گاڑیوں کو نقصان پہنچا ہے۔

سول ہسپتال میں موجود عملے نے بتایا ہے کہ ایک لاش کے دونوں ہاتھ غائب تھے اور پیچھے سر نہیں تھا جبکہ چہرہ قابل شناخت تھا۔