 | | | | | | | |||||||||||||||||||||||||||||||||||
| | ||||||||||||||||||||||||||||||||||||||||
|
بجلی کے نئے نرخوں کا ازسرِنو جائزہ | ||||||||||||||||||||||||||||||||||||||||
پاکستانی حکومت نے بجلی کے نرخوں میں اضافے سے متعلق حالیہ فیصلے پر عمل درآمد روک دیا ہے اور ان نرخوں کا دوبارہ جائزہ لیا جائے گا۔ پانی و بجلی کے وفاقی وزیر راجہ پرویز اشرف نے جمعرات کو ایک پریس کانفرنس سے خطاب کرتے ہوئے کہا کہ جب تک اس حوالے سے کوئی فیصلہ نہیں کیا جاتا صارفین سے مقررہ تاریخ پر بجلی کا بل جمع نہ کروانے پر سر چارج وصول نہیں کیا جائے گا۔ انہوں نے کہا کہ بجلی کی کمی ایک سنجیدہ مسئلہ ہے اور حکومت اس مسئلے پر قابو پانے کے لیے تمام ممکنہ وسائل استعمال کر رہی ہے۔ راجہ پرویز اشرف نے کہا کہ صدر اور وزیر اعظم نے اُن کی سربراہی میں اراکین پارلیمنٹ کی ایک کمیٹی تشکیل دی ہے جو اس حوالے سے مختلف امور پر غور کر رہی ہے۔ انہوں نے کہا کہ جب تک اس مسئلے کا حل نہیں نکلتا اُس وقت تک اس کمیٹی کے اجلاس جاری رہیں گے۔ پانی وبجلی کے وزیر نے کہا کہ اس اجلاس میں بجلی کی قیمت کا تعین کرنے والا ادارہ نیپرا، پیٹرولیم، خزانہ، سول سوسائٹی، ذرائع ابلاغ اور دوسرے شعبہ زندگی سے تعلق رکھنے والے افراد کو بھی مدعو کیا جائے گا اور اگر اُن کے پاس اس مسئلے کا کوئی حل ہے تو اس کا خیر مقدم کیا جائے گا۔ انہوں نے کہا کہ اس وقت زیادہ تر بجلی تیل سے پیدا کی جا رہی ہے جبکہ گیس میں کمی کی وجہ سے ایک ہزار میگاواٹ بجلی پیدا نہیں ہو رہی۔ انہوں نے کہا کہ اس وقت ملک میں سات ہزار میگاواٹ بجلی کی کمی کا سامنا ہے۔ راجہ پرویز اشرف نے کہا کہ آئندہ سال بھاشا ڈیم کا افتتاح ہو جائے گا جہاں سے بھی بجلی کی پیداوار شروع کی جائے گی۔ انہوں نے کہا کہ حکومت نے ہنگامی اقدامات کرتے ہوئے بجلی پیدا کرنے والی نجی کمپنیوں کو ٹھیکہ دیا جو 1500 میگاواٹ بجلی پیدا کر رہے ہیں۔ انہوں نے کہا کہ گزشتہ آٹھ سال سے بجلی کا کوئی نیا منصوبہ شروع نہیں کیا گیا جس کی وجہ سے ملک میں بجلی کا بحران شدت اختیار کر گیا ہے۔ انہوں نے دعوی کیا کہ حکومت ایسے منصوبے شروع کرنا چاہتی ہے جس سے ملک بجلی پیدا کرنے میں خودکفیل ہو۔ واضح رہے کہ ملک بھر میں بجلی کی بندش اور بجلی کے نرخوں میں حالیہ اضافے کی وجہ سے پرتشدد احتجاجی مظاہرے جاری ہیں اور بجلی کی بندش کی وجہ سے متعدد صنعتیں بھی بند ہوچکی ہیں۔ |  اسی بارے میں  بجلی کے نرخوں میں 70 فیصد اضافہ09 October, 2008 | پاکستان بجلی شام کو مہنگی ، دن میں سستی14 October, 2008 | پاکستان بجلی کی بندش، احتجاج، مظاہرے14 October, 2008 | پاکستان بجلی کا بحران ختم کرنے کو کوششیں 20 October, 2008 | پاکستان ’شرائط معاشی سے زیادہ سیاسی ہو سکتی ہیں‘21 October, 2008 | پاکستان ’ملک کا بینکاری نظام محفوظ‘22 October, 2008 | پاکستان | ||||||||||||||||||||||||||||||||||||||||
| |||||||||||||||||||||||||||||||||||||||||
| |||||||||||||||||||||||||||||||||||||||||
