عبدالحئی کاکڑ بی بی سی اردوڈاٹ کام، پشاور

	پاکستان فوج کے مطابق طالبان کے مرکز اور دیگر مشتبہ ٹھکانوں پر توپخانے سے حملے جاری ہیں

پاکستانی فوج کے ترجمان میجر مراد خان کا کہنا ہے کہ سکیورٹی فورسز نے بدھ کو خزانہ سے آگے کے علاقے پر قبضہ کر لیا ہے جبکہ لوئی سم میں طالبان کے مرکز اور دیگر مشتبہ ٹھکانوں پر توپخانے سے حملے جاری ہیں۔ انہوں نے دعوی کیا کہ بدھ کو ہونے والی کارروائی میں انیس طالبان کو ہلاک کر دیا گیا ہے۔

انہوں نے یہ دعوی بھی کیا کہ گزشتہ ایک ہفتے کے دوران ایک سو پچاس کے قریب طالبان کو ہلاک کیا گیا ہے۔ تاہم طالبان ترجمان مولوی عمر نے تازہ حملوں میں اپنے انیس ساتھیوں کی ہلاکت کے حکومتی دعوی کی تردید کی ہے۔ انہوں نے کہا کہ گزشتہ ایک ہفتے کے دوران ہونے والی کارروائیوں میں اب تک صرف چھ طالبان مارے گئے ہیں۔

باجوڑ میں کرفیو بدستور برقرار ہے اور مقامی لوگوں کا کہنا ہے کہ ہر گزرتے دن کے ساتھ ان کی مشکلات میں اضافہ ہو رہا ہے۔ ان کے بقول خوردنوش کی اشیاء ختم ہوگئی ہیں جبکہ علاقے میں گزشتہ ایک ماہ سے بجلی نہیں ہے۔

انہوں نے مزید بتایا کہ تمام تحصیلوں کے بازار بند پڑے ہیں جس کی وجہ سے لوگوں کو شدید مالی نقصان کا سامنا کرنا پڑ رہا ہے۔