آصف فاروقی بی بی سی اردو ڈاٹ کام، اسلام آباد۔

	پیپلز پارٹی کی حکومت نے ان مقدمات سے لاتعلقی کا اظہار کیا ہے

راولپنڈی کے سپیشل جج سنٹرل کی عدالت میں جمعرات کو جب اس درخواست کی سماعت کا آغاز ہوا تو عدالت میں موجود نیب کے سینئر پراسیکیوٹر جنرل دانشور ملک نے عدالت کو بتایا کہ انہوں نے اس مقدمے کی جلد سماعت شروع کرنے کے لئے نئی درخواست دائر نہیں کی جبکہ عدالت جس درخواست کی سماعت کر رہی ہے وہ گزشتہ برس سات اگست کو دائر کی گئی تھی۔

راولپنڈی میں احتساب عدالت نہ ہونے کے باعث اس مقدمہ کی سماعت سپیشل جج کی عدالت میں کی گئی۔

سپیشل جج شوکت علی صادق پر مشتمل عدالت نے نیب کے وکیل کا مؤقف سننے کے بعد اس پر سماعت سات اکتوبر تک ملتوی کر دی۔

دانشو ملک نے بعد ازاں صحافیوں کے سامنے بھی یہی موقف رکھا کہ عدالت میں نیب نے شریف برداران کے خلاف جلد کارروائی شروع کرنے کے لئے کوئی نئی درخواست دائر نہیں کی۔

نیب کی جانب سے یہ موقف وفاقی وزیر قانون فاروق ایچ نایئک کے اس بیان کے بعد سامنے آیا ہے جس میں انہوں نے کہا تھا کہ وہ نیب کے سربراہ سے شریف بردران کے خلاف مقدمات کی سماعت شروع کرنے کے لئے درخواست دائر کرنے کی وجوہات معلوم کر رہے ہیں کہ ایسا انہوں نے کیوں اور کیسے کیا ہے۔

دوسری جانب پیپلز پارٹی اور مسلم لیگ کے بعض رہنماؤں نے درخواست دائر کئے جانے کو نیب میں سابق حکومت کی باقیات اور اسٹیبلشمنٹ کی سازش قرار دیا تھا۔

نیب کے ڈپٹی پراسیکیوٹر ذوالفقار بھٹہ کی جانب سے گزشتہ ہفتے عدالت سے درخواست کی گئی تھی کہ شریف برادران کے خلاف حدیبیہ پیپر ملز سمیت بدعنوانی کے دیگر تین مقدمات میں سماعت جلد شروع کی جائے۔