عزیزاللہ خان بی بی سی اردو ڈاٹ کام، کوئٹہ

	مخلوط حکومت میں شامل بی این پی کے سینیٹر اسراراللہ زہری نے قتل کے اس واقعہ کو بلوچ روایات قرار دیا

ڈپٹی انسپکٹر جنرل پولیس نصیر آباد شبیر احمد شیخ نے بتایا ہے کہ قبریں لڑکیوں کے آبائی گاؤں بابا کوٹ سے دس کلومیٹر دور تھیں۔ انہوں نے کہا کہ ڈاکٹروں، پولیس اور مجسٹریٹ کی موجودگی میں قبر کشائی کی گئی ہے جہاں سے دو لڑکیوں کی لاشیں ملی ہیں اور ان لاشوں پر گولیوں کے نشان تھے۔

سینیٹر اسرار اللہ زہری کے استعفے کا مطالبہ

شبیر احمد شیخ نے بتایا ہے کہ لڑکیوں کو بغیر کفن کے سادہ کپڑوں میں دفن کیا گیا تھا جس سے ظاہر ہوتا ہے کہ ان لڑکیوں کو سیاہ کاری کے الزام میں قتل کیا گیا ہے کیونکہ اس طرح کے واقعات میں لاش کو کفن میں دفن نہیں کیا جاتا ہے۔

مقامی صحافی ہاشم بلوچ نے بتایا ہے کہ اس بارے میں تحقیقات کی جارہی ہیں۔

ابتدائی اطلاعات کے مطابق یہ بات سامنے آئی تھی کہ پانچ خواتین کو زندہ جلا کر دفن کیا گیا تھا جس کے بعد پولیس نے نے بتایا کہ یہ پانچ خواتین نہیں تھیں بلکہ تین خواتین تھیں جنھیں قتل کیا گیا ہے۔

سندھ اسمبلی میں کل یعنی سوموار کے روز اس واقعہ کی مذمت کی گئی تھی لیکن بلوچستان اسمبلی میں اس حوالے سے کوئی بات نہیں کی گئی۔

مخلوط حکومت میں شامل بلوچستان نیشنل پارٹی کے رہنماسینیٹر اسراراللہ زہری نے قتل کے اس واقعہ کو بلوچ روایات قرار دیا ہے۔