شہزاد ملک بی بی سی اردو ڈاٹ کام، اسلام آباد

	توانا پروگرام میں ہونےوالے مبینہ گھپلوں کی رپورٹ آئندہ پندرہ روز میں تیار کر لی جائے گی

سنیچر کے روز ذیلی کمیٹی کا اجلاس پارلیمنٹ ہاؤس میں ہوا۔ اجلاس میں سابق وزیر اعظم شوکت عزیز کو بھی طلب کیا گیا تھا لیکن وہ اجلاس میں نہیں آئے۔ سینیٹر انور بیگ کے مطابق وزارت خارجہ کے اہلکاروں نے بتایا ہے کہ انہوں نے لندن میں سابق وزیر اعظم کو کمیٹی کے اس اجلاس میں شریک ہونے کا دعوت نامہ پہنچا دیا ہے۔

دودھ اور بسکٹ  یہ منصوبہ 60 کروڑ روپے کی لاگت سے شروع کیا گیا تھا جس کے تحت دور دراز علاقوں میں سکولوں کی بچیوں کو ایک ایک دودھ کا پیکٹ اور ایک ایک بسکٹ کا پیکٹ دیا جائے گا۔ انہوں نے کہا کہ اس میں سے صرف 30 فیصد لوگوں کو فائدہ پہنچا جبکہ باقی رقم انتظامی امور کے مد میں خرد برد کر دی گئی سربراہ بیت المال

بیت المال کے چیئرمین زمرد خان نے کہا کہ یہ منصوبہ 60 کروڑ روپے کی لاگت سے شروع کیا گیا تھا جس کے تحت دور دراز علاقوں میں سکولوں کی بچیوں کو ایک ایک دودھ کا پیکٹ اور ایک ایک بسکٹ کا پیکٹ دیا جائے گا۔ انہوں نے کہا کہ اس میں سے صرف 30 فیصد لوگوں کو فائدہ پہنچا جبکہ باقی رقم انتظامی امور کے مد میں خرد برد کر دی گئی۔

سابق حکمراں جماعت پاکستان مسلم لیگ قاف سے تعلق رکھنے والی سابق وزیر زبیدہ جلال نے جو اس اجلاس میں موجود تھیں کہا کہ اُن کے دور میں اس منصوبے میں کوئی کرپشن نہیں ہوئی۔ انہوں نے کہا کہ یہ پروگرام سنہ دوہزار دو میں شروع کیا گیا تھا جبکہ انہوں نے سنہ دو ہزار چار میں وزارت سماجی بہبود اور خصوصی تعلیم کا چارج سنبھالا تھا۔

الزام کی تردید  میرے دور میں اس منصوبے میں کوئی کرپشن نہیں ہوئی۔ یہ پروگرام سنہ دوہزار دو میں شروع کیا گیا تھا جبکہ میں نے سنہ دو ہزار چار میں وزارت سماجی بہبود اور خصوصی تعلیم کا چارج سنبھالا تھا زبیدہ جلال

سابق ڈپٹی چیئرمین پلاننگ کمیشن اکرم شیخ نے کہا کہ اُن کی طرف سے کوئی اقدام غلط نہیں اُٹھایا گیا۔ انہوں نے کہا کہ ستمبر سنہ دو ہزار سات تک اس منصوبے میں کوئی خرابی نہیں تھی اور اُس کے بعد اس میں اچانک مبینہ گھپلے منظر عام پر آ گئے۔

سابق ڈپٹی چیئرمین پلاننگ کمیشن نے کہا کہ وزیر اعظم معائنہ کمیشن کی طرف سے انہیں کوئی نوٹس نہیں ملا۔ انہوں نے کہا کہ اگر اُن سے جواب طلبی گی گئی تو وہ بہت سے لوگوں کے ناموں کو سامنے لائیں گے۔

ٹی وی اداکار فردوس جمال نے کہا کہ انہوں نے ’توانا پاکستان‘ کی اشتہاری مہم کے لیے ایک ٹینڈر لیا تھا اور اس سلسلے میں ایک اشتہار بنا کر مختلف ٹی وی چینلوں پر چلایا گیا۔ انہوں نے کہا کہ انہوں نے یہ ٹینڈر دو کروڑ روپے میں لیا تھا اور اس میں کوئی گھپلے نہیں ہوئے۔