اعجاز مہر بی بی سی اردو ڈاٹ کام، اسلام آباد

	کچھ جگہ سڑکوں پر لوگ جشن مٹنا رہے ہیں

ایک بج کر گیارہ منٹ پر جب تلاوت شروع ہوئی اور تلاوت کے لیے جس آیت کا انتخاب کیا گیا وہ بھی حالات سے موافق لگ رہی تھی۔

’ملک اور قوم کی خاطر مستعفی ہو رہا ہوں‘

نیا سوٹ اور ٹائی پہنے صدر کے لہجے میں گھن گرج تھی لیکن دو سے زیادہ مواقع پر جہاں ان کی زبان لڑکھڑائی وہاں ان کے چہرے پر تناؤ اور آنکھوں میں نمی دکھائی دی۔

ایک گھنٹے کی تقریر میں انہوں نے نواز شریف اور آضف علی زرداری کا نام لیے بنا ان کے خلاف تنقید کی۔ تقریر کی شروعات سے تو لگا کہ وہ روانی سے اور ٹو دی پوائنٹ بول رہے ہیں لیکن آخر میں ان کے جملے بے ربط ہو گئے۔

تقریر کے دوران کئی مواقع پر صدر پرویز مشرف بولتے تو رہے لیکن ان کی گردن جھکی ہوئی اور نظریں نیچے تھیں۔

یہ پہلا موقع تھا جہاں ان کے ارد گرد ملٹری سیکریٹری یا محافظ کمانڈوز کو ٹی وی چینلز نے نہیں دکھایا اور نہ ہی صدر کی آمد اور روانگی کے شاٹ دکھائے گئے۔ لیکن صدر نے اپنے استعفے کا اعلان مکمل پروٹوکول کے ساتھ کیا۔

آخری کلمات ادا کرتے ہوئے صدر جذبات پر قابو نہ رکھ سکے۔ جہاں جہاں ان کا لہجہ دھیمہ ہوا وہاں آواز بھی بھرا گئی۔

آخری چند جملے انہوں نے کچھ وقفے وقفے سے ادا کیے لیکن جاتے جاتے جہاں ملک و قوم کے لیے جان دینے کی بات کی وہاں انہوں نے یہ بھی کہا کہ ’پاکستان کا خدا حافظ‘۔

صدر نے روسٹرم چھوڑتے وقت دونوں بازو بلند کر کے اپنی تقریر ختم کی لیکن اس دوران ان کے چہرے کے تاثرات ان کے مُکوں کا ساتھ نہیں دے رہے تھے۔

جنرل (ر) پرویز مشرف کے مستعفی ہونے پر اکثر مقامات پر خوشیاں منانے کی اطلاعات ہیں لیکن ان کے حامی سیاسی حلقوں میں افسردگی اور غمی کا عالم بھی ہے۔