رچرڈ باؤچر نے فوج اور آئی ایس آئی کا خاص طور پر ذکر کیا۔

مسٹر باؤچر نے یہ بات کولمبو میں جنوب ایشیائی ممالک کی تنظیم سارک کے اجلاس کے دوران کہی جہاں ہندوستان اور افغانستان نے کابل میں ہندوستانی سفارت خانے پر حملے کے لیے پاکستان کی خفیہ ایجنسی آئی ایس آئی کو دمہ دار ٹھہرایا تھا۔

مسٹر باؤچر نے کہا کہ ’پاکستان کے لیے یہ بہت ضروری ہے اس کی حکومت کے تمام شعبہ ایک ہی سمت میں چلیں۔‘

انہوں نے کہا کہ پاکستان میں ایک نئی سیاسی قیادت نے حکمرانی سنبھالی ہے اور اس کے سامنے کئی بڑے چیلنج ہیں جن میں سے ایک یہ ہے کہ’ فوج اور انٹیلی جنس سروسز سمیت دوسرے ادارے اس کے ساتھ مل کر کام کریں۔‘

’حکومت کو اگر واقعی دہشت گردی پر قابو پانا ہے تو اسے سب کو ایک ہی سمت میں لیکر چلنا ہوگا۔‘

امریکہ کو سارک میں مبصر کی حیثیت حاصل ہے اور اجلاس میں مسٹر باؤچر اس کی نمائندگی کر رہے ہیں۔

آئی ایس آئی کے کردار پر صرف ہمسایہ ممالک ہی نہیں امریکہ کی خفیہ ایجنسی سی آئی اے نے بھی انگلی اٹھائی ہے اور ایک امریکی اخبار کےمطابق سی آئی اے کے نائب ڈائریکٹر نے حال ہی میں حکومت پاکستان کو اس بات کے شواہد پیش کیے تھے کہ آئی ایس آئی کے طالبان سے روابط ہیں۔