شہزاد ملک بی بی سی اردو ڈاٹ کام، اسلام آباد

	پرویز الہی کا کہنا تھا کہ وہ مہنگائی کے خلاف حکومت پر دباؤ بڑھانے کے لیے احتجاج کی کال بھی دیں گے

بدھ کے روز اپنی رہائش گاہ پر پریس کانفرنس سے خطاب کرتے ہوئے انہوں نے کہا کہ اس ضمن میں سینیٹ کا اجلاس بھی جلد طلب کرلیا جائے گا۔

انہوں نے مزید کہا کہ پنجاب کے سابق وزیر قانون راجہ بشارت کی سربراہی میں ایک ٹاسک فورس قائم کردی گئی ہے جو کہ پنجاب حکومت کی طرف سے بلدیاتی ادراوں اور سیاسی مخالفین بالخصوص پاکستان مسلم لیگ قاف سے تعلق رکھنے والے افراد کو انتقامی کارروائیوں کا نشانہ بنانے کے بارے میں ایک وائٹ پیپر شائع کرے گی۔ انہوں نے کہا کہ اُن کی جماعت بلدیاتی اداروں کو ختم نہیں ہونے دے گی اور اس کا ہر سطح پر دفاع کرے گی۔

پرویز الہی نے کہا کہ راولپنڈی میں پنجاب میں بلدیاتی اداروں کا ایک کنونشن جلد طلب کیا جائے گا اس طرح ہر ضلع میں کنونشن کا انعقاد کیا جائے گا۔

انہوں نے الزام عائد کیا کہ پاکستان مسلم لیگ کی پنجاب کے بلدیاتی اداروں میں قابل ذکر نمائندگی نہیں ہے اس لیے وہ ان اداروں کو ختم کرنے کے درپے ہے۔

ایک سوال کے جواب میں سابق وزیر اعلیٰ پنجاب نے کہا کہ حکومت عوام کو ریلیف دینے میں ناکام ہوچکی ہے اور عوام کی توجہ اصل مسائل سے ہٹا کر سیاسی مخالفین کے خلاف کے خلاف مقدمے درج کیے جا رہے ہیں۔

انہوں نے کہا کہ موجودہ حکمراں اتحاد کی ناکامی کی ذمہ داری پاکستان پیپلز پارٹی اور پاکستان مسلم لیگ نون پر عائد ہوتی ہے۔

قومی اسمبلی میں قائد حزب اختلاف نے کہا کہ موجودہ حکومت کی غیر دانشمندانہ پالیسیوں کی وجہ سے ملک کی برامدات میں کمی کے علاوہ ملکی ذخائر بھی کم ہو رہے ہیں۔ انہوں نے کہا کہ مہنگائی کے خلاف حکومت پر دباؤ بڑھانے کے لیے احتجاج کی کال بھی دیں گے۔

اس سے قبل راولپنڈی ڈویژن سے تعلق رکھنے کے ناظمین کا اجلاس ہوا جس میں پنجاب حکومت کی طرف سے ان اداروں کے خلاف کاروائیوں پر غور کیا گیا۔