عبادالحق بی بی سی اردو ڈاٹ کام،لاہور

	صدر مشرف کی آمریت اب آخری سانسیں لے رہی ہے: شہباز

وزیراعلیْ کی حلف برداری کے بعدگورنر نے پندرہ رکنی صوبائی کابینہ سے بھی حلف لیا۔

انتقام نہیں ہم کسی سے انتقام نہیں لیں گے۔ ان لوگوں سے خود وقت نے انتقام لے لیا ہے اور اب وہ ماضی کا قصہ بن چکے ہیں شہباز شریف

حلف برادری کی تقریب میں مسلم لیگ نون کے رہنماؤں اور کارکنوں نے شرکت کی۔شہباز شریف کے حلف اٹھانے کے بعد گورنر ہاؤس کے دربار ہال میں موجود مسلم لیگ نون کے کارکنوں نے وزیر اعظم نواز شریف کا نعرہ لگایا تو شہباز شریف نے ان کارکنوں کو ہاتھ کے اشارے سے ایسا کرنے سے روک دیا۔

اس سے قبل اتوار کو ہی پنجاب اسمبلی نے شہباز شریف کو بلامقابلہ وزیراعلیٰ منتخب کیا تھا۔ پنجاب اسمبلی میں قائد ایوان یعنی وزیراعلٰی کے چناؤ کے لیے مسلم لیگ نون اور ان کی اتحادی جماعتوں کی طرف سے شہباز شریف نے اپنے کاغذات نامزدگی جمع کرائے تھے جبکہ ان کے مدمقابل کسی دوسری جماعت یا رکن اسمبلی نے کاغذات جمع نہیں کرائے۔

شہباز شریف وزارت اعلٰی کے عہدے کے واحد امیدوار ہونے کی وجہ سے بلامقابلہ وزیراعلٰی منتخب ہوگئے۔اٹھاون سالہ شہباز شریف پنجاب کے اکیسویں وزیراعلٰی ہو نگے۔

انصاف کا کٹہرا ماضی میں جن لوگوں نے سیاسی کارکنوں کوتشدد کا نشانہ بنایا ہے ان کے ساتھ کوئی غیر قانونی سلوک نہیں کیا جائے گا البتہ انہیں انصاف کے کٹہرے میں کھڑا کیا جائے گا شہباز شریف

پنجاب اسمبلی کے اجلاس میں شہباز شریف کو رائے شماری کے دوران دو سو پینسٹھ ووٹ ملے۔ سپیکر پنجاب اسمبلی نے جب شہباز شریف کی کامیابی کا اعلان کیا تو ایوان میں موجود ارکان اسمبلی نےنواز شریف اور بینظیر بھٹو کے حق میں نعرے لگائے۔

پنجاب اسمبلی میں حزب مخالف کی جماعت مسلم لیگ ق نے اسمبلی میں اپوزیشن لیڈر کا تقرر نہ ہونے پراس انتخاب کا بائیکاٹ کیا۔ مسلم لیگ قاف نے اسمبلی کے اجلاس میں شرکت نہیں کی اور پنجاب اسمبلی کی عمارت کے باہر احتجاجی کیمپ لگایا جسے’اپوزیشن چیمبر‘ کا نام دیا گیا۔

انتخاب کے بعد ایوان سے خطاب کرتے ہوئے شہباز شریف نے کہا کہ صدر مشرف کی آمریت اب آخری سانسیں رہی ہیں۔ ان کا کہنا تھا کہ آٹھ سالہ آمریت کے دور میں پاکستان میں مسائل کے انبار لگ گئے ہیں اور’ آٹھ سال وردری کا نعرہ لگانے والے اگر پانی کا نعرہ لگاتے تو آج حالات مختلف ہوتے‘۔

شہباز شریف نے کہا کہ گزشتہ آٹھ سالہ دور ملک کا بدترین دور تھا اور اس دوران سیاسی کارکنوں کو تشدد کا نشانہ بنایا گیا۔ ان کا کہنا تھا کہ ماضی میں جن لوگوں نے سیاسی کارکنوں کوتشدد کا نشانہ بنایا ہے ان کے ساتھ کوئی غیر قانونی سلوک نہیں کیا جائے گا البتہ انہیں انصاف کے کٹہرے میں کھڑا کیا جائے گا۔

انہوں نے آرمی چیف سے مطالبہ کیا کہ مسلم لیگ نون اور پیپلز پارٹی کے کارکنوں کو تشدد کا نشانہ بنانے والے آرمی افسروں کو قرار واقعی سزائیں دی جائیں۔

نومنتحب وزیراعلیْ نے اعلان کیا کہ’ ہم کسی سے انتقام نہیں لیں گے۔ ان لوگوں سے خود وقت نے انتقام لے لیا ہے اور اب وہ ماضی کا قصہ بن چکے ہیں‘۔ان کے بقول سیاسی انتقام ان کی اور ایوان کی ڈکشنری میں نہیں ہے۔