شہزاد ملک بی بی سی اردو ڈاٹ کام، اسلام آباد

	ڈیپوٹیشن پر آنے والے مختلف افسران اپنے محکموں میں واپس چلے جائیں گے

ان میں پچاسی افراد کنٹریکٹ پر ہیں جبکہ اکتالیس افراد مختلف محکموں سے ڈیپوٹیشن پر نیب میں آئے تھے۔ نیب کے میڈیا ترجمان غزنی خان نے بی بی سی کو بتایا کہ ڈیپوٹیشن پر آنے والے مختلف افسران اپنے محکموں میں واپس چلے جائیں گے جبکہ کنٹریکٹ والوں میں ریٹائرڈ پولیس افسران اور بینکار شامل ہیں۔

انہوں نے کہا کہ نیب کے ہیڈ کوراٹر سے سترہ افسران کو فارغ کیا گیا ہے ان میں دس کنٹریکٹ کے اور سات ڈیپوٹیشن پر آنے والے افسران شامل ہیں۔

غزنی خان کے مطابق نیب پنجاب سے انتیس ملازمین کو فارغ کیا گیا ہے جن میں بیس کنٹریکٹ پر اور نو ڈیپوٹیشن پر آئے تھے۔ صوبہ سندھ میں نیب سے بیالیس افسران کو فارغ کیا گیا ہے جن میں تیس کنٹریکٹ پر اور بارہ ڈیپوٹیشن پر تھے۔

صوبہ سرحد سے نیب کے سترہ ملازمین کو فارغ کیا گیا ہے ان میں دس کنٹیریکٹ پر اور سات ڈیپوٹیشن پر آئے ہوئے افسران شامل ہیں۔ اس کے علاوہ بلوچستان سے فارغ ہونے والے نیب کے چھ افسران شامل ہیں ان میں کنٹریکٹ کے چار اور ڈیپوٹیشن کےدو افسران شامل ہیں۔

راولپنڈی سے پندرہ افسران کو فارغ کیا گیا ہے جن میں گیارہ کنٹریکٹ اور چار ڈیپوٹیشن پر آئے ہوئے افسران شامل ہیں۔

ڈیپوٹیشن پر آئے ہوئے افسران میں زیادہ تر پولیس اہلکار اور انجنیئر شامل ہیں اور ان افراد سے کہا گیا ہے کہ وہ فوری طور پر اپنے محکموں میں رپورٹ کریں۔

واضع رہے کہ وزیر اعظم سید یوسف رضا گیلانی نے قومی اسمبلی میں اپنی پہلی تقریر کے دوران نیب کا ادارے میں کمی کرنے کا اعلان کیا تھا اور اُن کا کہنا تھا کہ یہ ادارہ سیاستدانوں کے خلاف مقدمات قائم کرنے کے لیے استعمال ہوتا ہے۔