شہزاد ملک بی بی سی اردو ڈاٹ کام، اسلام آباد

	شیر پاؤ کے خلاف پشاور کے علاقے حیات آباد میں اختیارات کا ناجائز استعمال کرکے پلاٹ خریدنے کا ریفرنس بھیجا گیا گیا تھا

یہ درخواستیں پشاور ہائی کورٹ کے فیصلے کے خلاف دائر کی گئی تھیں جس میں عدالت نے آفتاب شیرپاؤ اور پشاور ڈویلپمنٹ اتھارٹی کے سابق ڈائریکٹر جنرل کو کرپشن ریفرنس میں بری کردیا تھا۔

سپریم کورٹ کے چیف جسٹس عبدالحمید ڈوگر کی سربراہی میں سپریم کورٹ کے تین رُکنی بینچ نے بدھ کے روز ان درخواستوں کی سماعت شروع کی تو نیب کے پراسیکوٹر جنرل ڈاکٹر دانشور ملک نے دلائل دیتے ہوئے کہا کہ آفتاب احمد خان شیرپاؤ اور پشاور ڈویلپمنٹ اتھارٹی کے سابق ڈائریکٹر جنرل ظاہر شاہ کے خلاف کرپشن کے مقدمات ہیں جو این آر او کے دائرے میں نہیں آتے۔

انہوں نے کہا کہ ان افراد کے خلاف ستائیس جنوری سنہ انیس سو ستانوے کو قومی احتساب بیورو نے پشاور کے علاقے حیات آباد میں اختیارات کا ناجائز استعمال کرکے پلاٹ خریدنے کا ریفرنس بھیجا تھا جس پر انہیں نیب کی عدالت نے مجرم قرار دیا تھا۔

انہوں نے کہا کہ نیب کا ادارہ اس حوالے سے مذکورہ افراد کے خلاف تحقیقات کر رہا ہے۔

واضح رہے کہ مذکورہ افراد نے نیب کے اس فیصلے کے خلاف پشاور ہائی کورٹ میں رٹ دائر کی تھی جس میں عدالت نے انہیں اس ریفرنس میں بری کردیا تھا تاہم نیب نے پشاور ہائی کورٹ کے اس فیصلے کے خلاف سپریم کورٹ میں اپیل دائر کر رکھی تھی۔

آفتاب شیرپاؤ کے وکیل نے عدالت میں دلائل دیتے ہوئے کہا کہ اُن کے موکلوں کا کیس قومی مفاہمتی آرڈیننس کے دائرے میں آتا ہے لذا اُنہیں بھی ریلیف فراہم کا جائے۔

انہوں نے کہا کہ متعدد سیاستدانوں اوربیوروکریٹس کے خلاف مقدمات اسی این آر او کے تحت ختم ہوئے ہیں۔ عدالت نے آفتاب احمد خان شیرپاؤ کے وکیل کے دلائل سے اتفاق کرتے ہوئے نیب کی تین درخواستیں مسترد کردیں۔

نیب کے ڈپٹی پراسکیوٹر جنرل ذوالفقار بھٹہ کے مطابق راولپنڈی کی نیب کی عدالت نے نیو سٹی پروجیکٹ میں آفتاب احمد خان شیرپاؤ اور قومی اسمبلی کے سابق ڈپٹی سپیکر حاجی نواز کھوکھر کی ضابطہ فوجداری کی دفعہ 265-K کے تحت بریت کی درخواستیں منظور کرتے ہوئے انہیں اس ریفرنس سے بری کر دیا ہے۔