دلاور خان وزیر بی بی سی اردو ڈاٹ کام، ڈیرہ اسماعیل خان

	ڈیرہ اسماعیل خان فرقہ وارانہ فسادت کے لحاظ سے انتہائی حساس ضلع ہے

زخمیوں کو ڈیرہ اسماعیل خان کے سول ہسپتال میں داخل کر دیا گیا ہے۔

ڈیرہ اسماعیل خان پولیس کے سربراہ عبدالغفار قیصرانی نے بی بی سی کو بتایا کہ اتوار کی شام سات بجے بنوں روڈ پر کوٹلی امام میں جاری شہدائے اسلام کانفرنس کے اختتام پر ایک خودکش حملہ آور نے پنڈال میں داخل ہونے کی کوشش کی لیکن اس سے پہلے ایک ناکے پر پولیس نے اسے رکنے کو کہا۔

پولیس سربراہ کے مطابق ناکے پر پہنچنے سے پہلے ہی خودکش حملہ آور نے دھماکہ کر دیا جس کے نتیجے میں وہ خود ہلاک ہو گیا جبکہ اس کے قریب موجود چار افراد شدید زخمی ہوگئے جنہیں ڈیرہ اسماعیل سول ہسپتال میں داخل کر دیا گیا ہے۔

پولیس کا کہنا ہے کہ زخمی ہونے والے تمام افراد کا تعلق اہل تشیع سے ہے اور وہ پولیس اہلکاروں کے ہمراہ حفاظتی ناکے پر مامور تھے۔

یاد رہے کہ ڈیرہ اسماعیل خان سنی شیعہ فرقہ وارانہ فسادت کے لحاظ سے انتہائی حساس ضلع ہے اورگزشتہ ایک مہینے کے دوران یہاں فرقہ وارانہ تشدد کے متعدد واقعات پیش آئے ہیں جن میں کم از کم پندرہ افراد ہلاک جبکہ دو درجن سے زیادہ زخمی ہوئے ہیں۔