ریاض سہیل بی بی سی اردو ڈاٹ کام، کراچی

	’ہائیکورٹ کے ججوں کی تعداد کے بارے میں آئین میں کوئی شق نہیں ہے‘

بی بی سی سے بات کرتے ہوئے فاروق نائیک نے کہا کہ انتظامی حکم نامے کی پیچھے بھی کوئی ایکٹ یا آرڈیننس ہونا ضروری ہے، جس کے حوالے سے یہ بات ہو سکے۔ اگر فریقین چاہتے ہیں کہ ججوں کو واپس لایا جائے تو پھر اس کے لیے آئین میں ترمیم کرنی پڑے گی۔

ان کا کہنا تھا کہ آئین ججوں کی تقرری کی بات کرتا ہے، بحالی یا دوبارہ تقرری کا کوئی ذکر نہیں اس لیے آئین میں تبدیلی لانی پڑے گی اور ججوں کی بحالی کی شق شامل کرنا پڑے گی۔

انہوں نے بتایا کہ آئینی پیکیج کا مسودہ اتحادی جماعتوں سمیت تمام فریقین کو فراہم کیا گیا ہے مگر کسی نے بھی تاحال تجاویز نہیں دی ہیں۔ فاروق نائیک نے کہ’ہم نے ان سے درخواست کی ہے کہ وہ جلد سے جلد اپنی تجاویز پیش کریں تاکہ ججوں کا مسئلہ حل کیا جا سکے‘۔ ان کا کہنا تھا کہ آئینی ترمیمی مسودہ کوئی مقدس دستاویز نہیں ہے اس میں ترمیم کے لیے پیش ہونے والی تجاویز پر غور کیا جائے گا۔

سپریم کورٹ کی طرح ہائیکورٹ میں ججوں کی تعداد میں اضافے کے بارے میں فاروق نائیک کا کہنا تھا کہ سپریم کورٹ کے جج صاحبان کی تعداد کے بارے میں آئین میں شق موجود ہے مگر ہائیکورٹ کے ججوں کی تعداد کے بارے میں آئین میں کوئی شق نہیں ہے ۔

وفاقی وزیر نے دعویٰ کیا کہ ہائی کورٹ کے ججز نے کبھی اس خواہش کا اظہار نہیں کیا کہ وہ بحالی چاہتے ہیں اور اگر انہوں نے یہ خواہش ظاہر کی تو انہیں بحال کر دیا جائے گا۔

سزائے موت کے خاتمے پر کچھ مذہبی علما اور رہنماؤں کی تنقید کے بارے میں فاروق نائیک کا کہنا تھا کہ مذہبی رہنما اس وجہ سے یہ بات کر رہے ہیں کیونکہ یہ سزا قصاص، تعزیر یا حد میں آجاتی ہے جس میں ورثا کو یہ اختیار دیا گیا ہے کہ وہ ملزم کو معاف کرسکتے ہیں۔

ہائی کورٹ کے ججز نے کبھی اس خواہش کا اظہار نہیں کیا کہ وہ بحالی چاہتے ہیں اور اگر انہوں نے یہ خواہش ظاہر کی تو انہیں بحال کر دیا جائے گا۔ فاروق نائیک

ان کا کہنا تھا کہ ایسے دیگر جرائم بھی ہیں جس میں سزائے موت کا ذکر کیا گیا ہے اور اس میں ریاست ملزم کو معاف کرنے کا اختیار رکھتی ہے۔ان کے مطابق اسمگلنگ اور دہشت گردی سمیت دیگر جرائم میں بھی سزائے موت ختم کر کے عمر قید شامل کرنے پر بھی غور کیا جا رہا ہے۔

پیپلز پارٹی کی چیئرپرسن بینظیر بھٹو کے قتل کی تحقیقات اقوام متحدہ سے کرانے کے حوالے سے انہوں نے کہا کہ سلامتی کونسل میں شامل ممالک کی حمایت حاصل کرنے کے لیے پاکستان کا مستقل نمائندہ کوشاں ہے اور وہ پرامید ہیں کہ تحقیقاتی کمیشن تشکیل دیا جائے گا جو ملزمان کو بے نقاب کرے گا۔