امداد علی سومرو لاہور

اگر سپریم کورٹ نے نواز شریف کے ساتھ انصاف نہ کیا اور شہباز شریف کے خلاف بھی کوئی فیصلہ آیا تو پھر پنجاب بھر میں ہڑ تال ہوگی:تاجر رہنما

ہڑتال کی کال پر ہفتہ کے روز شہر کے اہم تجارتی مراکز میں زیادہ تر دکانیں بند رہیں، تاہم چھوٹے علاقوں میں دکانیں کھلی رہیں اور وہاں ہڑتال کا خاص اثر دیکھنے میں نہیں آیا۔

تاجروں کی ہڑتال کی وجہ سے شہر میں ٹریفک معمول سے کم نظر آئی۔ تاجروں نے نواز شریف کے ساتھ اظہار یکجہتی کے لئے شہر بھر کی مارکیٹوں میں بینر آویزان کر رکھے ہیں۔ جبکہ شہر کی سڑکوں پر تاجروں اور مسلم لیگ نواز کی جانب سے بینر آویزاں کیے گئے ہیں جن پر ہائی کورٹ کے فیصلے اور پی سی او ججوں کے خلاف سخت نعرے درج ہیں۔

شہر کی اہم سڑکوں پر نواز شریف کی قدآور تصاویر لگائی گئی ہیں جن پر ’قدم بڑھاؤ نواز شریف ہم تمہارے ساتھ ہیں‘ یا ’عدلیہ کی بحالی کی جنگ، نواز شریف کے سنگ‘ جیسے نعرے درج ہیں۔

انجمن تاجران پاکستان کے رہنما حاجی مقصود بٹ کے مطابق ہڑتال مکمل طور پر کامیاب رہی، بڑی مارکیٹوں کے علاوہ چھوٹی تجارتی مراکز بھی بند رہے۔ انہوں نے کہا کہ تاجر برادری یہ سمجھتی ہے کہ ملک کے دو بار وزیراعظم رہنے والے میاں نواز شریف کے ساتھ بھی اگر ایسی ناانصافی کی گئی ہے تو پھر عام شہری کے ساتھ کون انصاف کرے گا۔

ان کا کہنا تھا کہ اگر سپریم کورٹ نے نواز شریف کے ساتھ انصاف نہ کیا اور شہباز شریف کے خلاف بھی کوئی فیصلہ آیا تو پھر انجمن تاجران پنجاب بھر میں ہڑ تال کرے گی اور پھِر ملک گیرہڑتال کی کال دی جائے گی۔

واضح رہے کہ قومی تاجر اتحاد کی کال پر جمعہ کے روز لاہور میں جزوی طور پر کاروبار بند رہا تھا۔ جبکہ مسلم لیگ نواز نے عدالتی فیصلے کے خلاف جمعہ کو یوم سیاہ منایا اور مال روڈ پر احتجاجی جلسہ بھی کیا تھا۔