علی سلمان بی بی سی اردو ڈاٹ کام، لاہور

	حمزہ شہباز پہلی بار رکن قومی اسمبلی بنے ہیں

حمزہ شہباز بھی اپنے والد کے طرح بلامقابلہ منتخب ہوئے ہیں۔

وہ پیر کو قومی اسمبلی پہنچے تو اراکین نے ڈیسک بجا کر ان کا استقبال کیا، سپیکر ڈاکٹر فہمیدہ مرزا نے ان سے حلف لیا۔

انہوں نے بعد میں نکتہ اعتراض پر کہا کہ وہ آمریت کو شکست دیکر اسمبلی تک پہنچے ہیں۔

شریف خاندان میں سے شہباز شریف اور حمزہ شہباز کے علاوہ نواز شریف کی اہلیہ کلثوم نواز کے رشتہ دار بلال یاسین قومی اسمبلی اور محسن لطیف پنجاب اسمبلی کے ممبر ہیں۔

جبکہ نواز شریف کے سمدھی اسحاق ڈار سینیٹر اور ایک قریبی رشتہ دار عابد شیر علی رکن قومی اسمبلی ہیں۔

حمزہ شہباز عملی سیاست کے علاوہ خاندان کے کاروبار میں بھی اپنے والد کے دست راست ہیں اور شریف خاندان کے کاروبار کے بٹوارے کے بعد وہ اپنے والد کے حصے کا بزنس بخوبی چلا رہے ہیں۔

حمزہ شہباز شریف اگرچہ پہلی بار رکن قومی اسمبلی بنے ہیں لیکن عملی سیاست میں وہ کئی برس پہلے ہی داخل ہوگئے تھے۔

مقتولہ سابق وزیراعظم بےنظیر بھٹو کے دور حکومت میں جب شہباز شریف بیرون ملک چلےگئے تھے تو ان کے صاحبزادے حمزہ شہباز کو ایک برس اڈیالہ جیل بھی کاٹنا پڑی تھی۔

بارہ اکتوبر سنہ ننانوے کو جب مسلم لیگ (ن) کی حکومت کا تختہ الٹا گیا تو حمزہ شہباز کو نظر بندی کا سامنا کرنا پڑا۔

یہ شاید اتفاق ہی ہے کہ جس روز حمزہ شہباز نے رکن قومی اسمبلی کے طور پر حلف اٹھایا ہے اُسی روز میاں نواز شریف کو لاہور ہائی کورٹ کے تین رکنی بینچ نے انتخاب لڑنے کے لیے نااہل قرار دیا ہے۔