عبادالحق بی بی سی اردو ڈاٹ کام،لاہور

	حمزا شریف کو مٹھائی کھلائی گئی ہے

الیکشن کمیشن کے سیکریٹری کنور دلشاد نے میاں حمزہ شریف کی کامیابی کا نوٹیفیکیشن جاری ہونے کی تصدیق کی۔

حمزہ شہباز لاہور سے قومی اسمبلی کے حلقہ ایک سو انیس سے انتخاب میں حصہ لے رہے تھے، اپنے مدمقابل تمام امیدواروں کے دستبردار ہونے کی وجہ سے بلا مقابلہ منتخب ہوگئے ہیں۔

حمزہ شہباز کے والد شہباز شریف بلامقابلہ رکن پنجاب ببنے کے بعد وزیر اعلیْ کے منصب پر فائز ہیں۔

حمزہ شہباز شریف کے مخالف امیدواروں میں پیپلز پارٹی کے ذکریا بٹ ، مسلم لیگ قاف کے امجد محمود چودھری اور دیگر آزاد امیدوار پہلے ہی دستبردار ہوچکے ہیں جبکہ اس حلقہ سے ایک خاتون امیدوار شبنم بیگم اور اختر جاوید خان نے بھی جمعرات کو اپنے کاغدات نامزدگی واپس لے لیے اس طرح قومی اسمبلی حلقہ ایک سو انیس سے حمزہ شہباز تمام امیدوار کے دستبردار ہونے پر اکیلے امیدوار رہ گئے۔

حمزہ شہباز شریف خاندان کے پہلے نوجوان ہیں جو رکن اسمبلی ببنے ہیں۔
حمزہ شہباز شریف نے اٹھارہ فروری کو ہونے والے عام انتخابات میں اپنے والد شہبازشریف کے کاغذات مسترد ہونے پر اپنے آبائی حلقہ سے انتخاب لڑنا تھا تاہم اس حلقہ میں مسلم لیگ قاف کے امیدوار بدر الدین بانڈے کے انتقال کے باعث انتخاب ضمنی تک ملتوی کردیا گیا تھا۔

شریف برادران کے کاغذات مسترد ہونے اور قومی اسمبلی کے حلقہ ایک سو انیس میں انتخاب ملتوی ہونے کی وجہ سے شریف خاندان کاکوئی فرد اٹھارہ فروری کوہونے والے انتخابات کی وجہ سے اسمبلی میں نہیں پہنچ سکا۔

خیال رہے کہ حمزہ شہباز کے والد شہباز شریف بھکر سے صوبائی اسمبلی حلقہ اڑیالیس سے پنجاب اسمبلی کے بلا مقابلہ رکن منتخب ہوئے ہیں اور بعدازں بلامقابلہ رکن وزیر اعلْیْ چنے گئے ہیں جبکہ ان کی تایا اور مسلم لیگ نون کے قائد نواز شریف لاہور کے قومی اسمبلی حلقہ ایک سو تئیس سے ضمنی انتخاب میں حصہ لے ہیں۔۔نواز شریف کے داماد کیپٹن ریٹائرڈ صفدر راولپنڈی کے قومی اسمبلی سے امیدوار ہیں۔