احمد رضا بی بی سی اردو ڈاٹ کام، اسلام آباد

	پاکستانی جیلوں میں گزشتہ برس ایک سو چونتیس افراد کو پھانسی دی گئی

ایک سال میں 135 کو پھانسی

تنظیم نے منگل کو جاری کردہ ایک بیان میں کہا ہے کہ پاکستان کی جیلوں میں قید اکتیس ہزار چار سو سزا یافتہ افراد میں سے سات ہزار سزائے موت کے منتظر ہیں اور اس طرح کل سزا یافتہ قیدیوں میں سے ایک چوتھائی ایسے ہیں جنہیں موت کی سزا سنائی گئی ہے۔

تنظیم کا کہنا ہے کہ ان افراد میں زیادہ تر غریب اور ان پڑھ لوگ ہیں اور بعض ایسے بھی ہیں جنہیں صرف غیر مسلم ہونے کی وجہ سے امتیاز کا نشانہ بنایا گیا ہے جبکہ بعض کو قانونی تقاضے پورے کیے بغیر جیلوں میں رکھا جا رہا ہے اور انہیں ایسے مقدمات کا سامنا ہے جو بین الاقوامی معیار پر پورا نہیں اترتے۔

بیان میں کہا گیا ہے کہ پاکستان میں پچھلے سال تین سو نو افراد کو موت کی سزا سنائی گئی تھی جبکہ ایک سو چونتیس افراد کو پھانسی دی گئی۔

ہیومن رائٹس واچ کے ڈائریکٹر ایشیاء براڈ ایڈمز کا کہنا ہے ’پاکستان دنیا کے ان ممالک میں شامل ہے جہاں ہر سال سزائے موت پانے والے افراد کی تعداد سب سے زیادہ ہے۔ اگر نئی حکومت واقعی انصاف میں دلچسپی رکھتی ہے تو اسے اس ناقابل قبول صورتحال کو ختم کرنا چاہیے‘۔

تنظیم نے یہ بھی دعویٰ کیا ہے کہ سابق آرمی چیف جنرل پرویز مشرف کے دور حکومت میں ان جرائم میں نمایاں اضافہ ہوا ہے جن کی سزا پاکستانی قانون کے مطابق موت ہے۔